Eric Maxim Choupo-Moting vazhdon kontratën me Bayernin
Uran Krasniqi / RTKLive
Eric Maxim Choupo-Moting do të qëndrojë në Munchen edhe për një vit. Bayern Munchen ia ka zgjatur kontratën e sulmuesit tridhjetë e tre vjeçar deri më 30 qershor 2024.
Me pesëmbëdhjetë gola në njëzet e katër ndeshje këtë sezon, kamerunasi është aktualisht golashënuesi më i mirë në skuadrën e Julian Nagelsmann së bashku me Jamal Musiala.
Futbollisti është shprehur i kënaqur me rinovimin.
"Padyshim që jam i kënaqur që mund ta ndihmoj ekipin kaq shumë. Shkoj shumë mirë me djemtë, ne punojmë shumë për qëllimet tona. Jam shumë i lumtur që do të qëndroj më gjatë dhe do të vazhdoj të argëtohem shumë me klubin. Këtu ndihem shumë si në shtëpinë time", ka thënë kamerunasi.
Ndërsa zyrtari i klubit, Hasan Salihamidzic, e ka vlerësuar vazhdimin e kontratës për lojtarin.
“Jemi shumë të kënaqur që Eric Maxim Choupo-Moting do të qëndrojë me ne edhe për një vit. Choupo është një artist me top dhe ka performuar shumë mirë vitet e fundit. Ai na ndihmoi në gjysmën e parë të këtij sezoni për të mbushur boshllëkun që kishim për qendërsulmues", ka thënë ai.























