Përzgjedhësi i Kombëtares së Shqipërisë, Sylvinho, në një konferencë për medie, një ditë para duelit me Poloninë, ka thënë se të besuarit e tij, janë të gatshëm për duelin me polakët.

Polonia dhe Shqipëria do të ndeshen mbrëma në Warshavë, në kuadër të kualifikueseve për EURO 2024.

Tekniku brazilian, i cili nesër debuton në krye të Kombëtares shqiptare, beson së skuadra e tij do të bëjë një ndeshje të bukur.

“Jemi gati, pas dy muajsh e gjysmë punë, kam punuar për të monitoruar futbollistët shqiptarë dhe për të zgjedhur 23, të cilët janë këtu. Jam shumë i kënaqur me të gjithë punën që kemi bërë gjatë 6 ditëve, me atmosferën që kemi krijuar të gjithë së bashku”, tha strategu brazilian.

“E dimë që do të jetë një ndeshje shumë e vështirë, por jemi të aftë ta përballojmë. Pjesa më e bukur e futbollit janë ato 90 minutat, kur luhet për gjithçka. Janë gati të 23 lojtarët që kemi grumbulluar, pasi duhet të luajmë në grup, me atmosferë të mirë”, theksoi Sylvinho.