(Plotësuar) Vazhdon seanca gjyqësore ndaj ish-krerëve të UÇK-së, ku edhe sot, në ditën tretë, vazhdon me dhënien e dëshmisë të dëshmitarit të mbrojtur në këtë çështje gjyqësore.

(Plotësuar) Jakup Krasniqi merr pjesë në seancë gjyqësore të pasditës

Sikundër bëri të ditur avokatja Venkateswari Alagendra, klienti i saj, ish-zëdhënësi i UÇK-së dhe ish-kryetari i Parlamentit të Kosovës, Jakup Krasniqi, nuk është ndjerë mirë me shëndet, por që më vonë, në seancën e pasditës.

“Zotëri Krasniqi nuk ndjehet shumë mirë për momentin, mendoj se mund të qëndrojë edhe pak por do të na thotë nëse ka nevojë të largohet dhe nëse na lejohet që të largohet”, ka thënë avokatja e Krasniqit.

Sikundër u shpreh Angela Griep, zëdhënëse e gjykatës, për arsye të privatësisë, ne nuk mund të japim informacion në lidhje me gjendjen shëndetësore të individit të akuzuar. 

Por avokatja e Krasniqit njoftoi se klienti i saj është mirë dhe se do të marrë pjesë në seancën e pasdites.

Seanca gjyqësore për ish-krerët e UÇK-së vazhdon të mbahet e mbylllur.

Nis seanca gjyqësore në Speciale, por e mbyllur për publikun

Ka nisur seanca gjyqësore ndaj ish-krerëve të UÇK-së, ku edhe sot, në ditën  tretë, vazhdon me dhënien e dëshmisë të dëshmitarit të mbrojtur në këtë çështje gjyqësore.

Seanca gjyqësore “Thaçi dhe të tjerët..” edhe sot vazhdon të jetë e mbyllur. Por mbyllja e saj, u bë pasi gjykatësi i Gjykatës Speciale Charles L. Smith, aprovoi  kërkesën e Geoffrey Roberts, avokatit të Rexhep Selimit, për shtimin e një materiali prove.

Materiali u aprovua në kohën kur dëshmitarja e parë e Prokurorisë Speciale për rastin “Thaçi dhe të tjerët” po intervistohet nga mbrojtja. E mbrojtja kërkoi nga trupi gjykues që të ketë 14 orë kohë për parashtrimin e pyetjeve.

Para se dëshmitarja e prokurorisë të sillej në seancë, avokati Roberts parashtroi  kërkesën për dy dokumente që t’i shtohen si materiale prove përgjatë periudhës së intervistimit.

Kjo është aprovuar nga gjykata dhe prokuroria nuk e ka kundërshtuar kërkesën, por tha se janë disa pjesë në dokument që janë përsëritëse, kurse më pas, seanca ka kaluar në private.

Ndryshe dje dëshmitarja e parë në rastin ndaj ish-krerëve të Ushtrisë Çlirimtare të Kosovës, ka vazhduar dhënien e dëshmisë, duke iu përgjigjur pyetjeve të mbrojtjes.

Edhe sot vazhdon procesi gjyqësor në rastin Thaçi dhe të tjerët

A.Bela/ RTKlive

Sot do të vazhdojë dita e tretë e dhënies së dëshmisë, të dëshmitarit të mbrojtur në çështjen gjyqësore "Thaçi dhe të tjerët".

Ndryshe dje dëshmitarja e parë në rastin ndaj ish-krerëve të Ushtrisë Çlirimtare të Kosovës, ka vazhduar dhënien e dëshmisë, duke iu përgjigjur pyetjeve të mbrojtjes.

Ndryshe, gjatë seancës së martës, dëshmitarja është përgjigjur pyetjeve të ZPS-së, e që po ashtu ka qenë seancë e mbyllur.

Lluka Mishetiq avokati mbrojtës i Hashim Thaçit, para se te hynte dëshmitarja në sallë kërkoi që ta dorëzoi një provë të re materiale, provë e cila nuk u kundërshtua nga ZPS-ja dhe më pas u pranua nga trupi gjykues.

Ndryshe aktakuza e parë kundër katër të akuzuarve u konfirmua më 26 tetor 2020 dhe u bë publike më 5 nëntor 2020. Më 22 korrik 2021, Gjykatësi i Procedurës Paraprake, përmes dy vendimeve, miratoi pjesërisht mocionet e Mbrojtjes dhe urdhëroi ZPS-në që të korrigjojë dhe ndryshojë aktakuzën, mes tjerash, duke përjashtuar përgjegjësinë e ndërmarrjes së përbashkët kriminale III për krime me synim konkret (tri apele kundër këtij vendimi, të dorëzuara nga Thaçi, Selimi dhe Krasniqi, u hodhën poshtë nga Gjykata e Apelit më 22 gusht 2022).

ZPS-ja e dorëzoi aktakuzën e ndryshuar më 3 shtator 2021. Më 23 dhjetor 2022, Gjykatësi i Procedurës Paraprake miratoi kërkesën e ZPS-së për ndryshim të aktakuzës me qëllim që të përfshijë një numër akuzash të reja, konkretisht qendra ndalimi të tjera në komunën e Suharekës, incidente të reja të përndjekjes dhe vrasjes së paligjshme në Gjilan, si dhe incidente të reja të pjesëmarrjes personale të të akuzuarit në krimet për të cilat akuzohet.

Pas hedhjes poshtë të apeleve të Thaçit dhe Veselit kundër këtij vendimi prej Panelit të Gjykatës së Apelit më 22 mars 2022, ZPS-ja dorëzoi versionin e redaktuar publik të aktakuzës së ndryshuar më 29 prill 2022. Më 22 korrik 2022, Gjykatësi i Procedurës Paraprake miratoi, pjesërisht, kërkesën e Mbrojtjes së Thaçit që pretendon mangësi në aktakuzën e fundit dhe gjithashtu urdhëroi ZPS-në që, deri më 30 shtator 2022, të parashtrojë aktakuzën e ndryshuar më tej, me informacion shtesë lidhur me akuzat aktuale. Informacioni shtesë ka të bëjë me emrat e autorëve të drejtpërdrejt të krimeve, viktimave dhe vendodhjeve përkatëse në paragrafet konkrete në aktakuzën aktuale.

Më 29 shtator 2022, Gjykatësi i Procedurës Paraprake miratoi kërkesën e ZPS-së për tërheqjen nga aktakuza të pretendimeve për krime në komunën e Ferizajt dhe urdhëroi ZPS-në që të pasqyrojë këtë tërheqje të akuzave në aktakuzën e ndryshuar më tej, e cila u dorëzua më 30 shtator 2022. Një version më pak i redaktuar i aktakuzës u dorëzua më 27 shkurt 2023. Aktualisht, kjo është aktakuza në fuqi për këtë çështje.

“Sipas aktakuzës, krimet e paraqitura në të u kryen më së paku prej marsit 1998 deri në shtator 1999 në disa vendndodhje në Kosovë, si edhe në Kukës dhe Cahan, në Shqipërinë Veriore. Pretendohet se këto krime u kryen nga anëtarë të UÇK-së kundër qindra civilëve dhe personave që nuk merrnin pjesë në luftime. Në aktakuzë pretendohet se Thaçi, Veseli, Selimi dhe Krasniqi kanë përgjegjësi penale individuale për krime që u kryen në kontekstin e një konflikti të armatosur jo ndërkombëtar në Kosovë dhe ishin pjesë e një sulmi gjerësisht të përhapur dhe sistematik kundër personave që dyshoheshin se ishin kundër UÇK-së”, njoftojnë Dhomat e Specializuara të Kosovës.