Kurti në takim me Heappey: Roli i britanikëve të jetë sa më aktiv në rajon
BKT
Foto: Kryeministria kosovare
Lajme

Kurti në takim me Heappey: Roli i britanikëve të jetë sa më aktiv në rajon

M.Sh/RTKlive

Kryeministri i Albin Kurti, priti në takim ministrin e shtetit për Forcat e Armatosura të Mbretërisë së Bashkuar, James Heappey, me të cilin biseduan për marrëdhëniet e mira ndërmjet Republikës së Kosovës dhe Mbretërisë së Bashkuar dhe për mundësitë që të rritet edhe më tej bashkëpunimi në fushën e mbrojtjes.

Kryeministri Kurti e falënderoi për vizitën dhe mbështetjen e vazhdueshme ndaj Kosovës në të gjitha fazat e zhvillimit të saj, teksa e uroi për kurorëzimin e Mbretit Charles III dhe Mbretëreshës Camilla, njofton Kryeministria.

Kurti  e njoftoi ministrin Heappey me progresin e Kosovës në këto dy vite qeverisje, duke theksuar se Kosova ka bërë rritje të shënuar ekonomike si për nga rritja e GDP-së, po ashtu edhe e investimeve dhe rritjes së të hyrave.

Pasi theksoi rritjen e buxhetit në fushën e mbrojtjes, kryeministri Kurti vlerësoi të nevojshëm rritjen e bashkëpunimit mes Kosovës dhe Mbretërisë së bashkuar në këtë drejtim me bashkë-zbarkime, trajnime dhe pajisje të reja ushtarake.Kujtojmë se deri më tani 28 kadetë të Forcës së Sigurisë së Kosovës kanë përfunduar me sukses programin e edukimit ushtarak në Akademinë Ushtarake Mbretërore të Sandhurst.

E ndërkaq ministri Heappey, sipas njoftimit të lëshuar nga Qeveria, ka nënvizuar se “Kosova është histori suksesi dhe duhet të punojmë së bashku për të promovuar progresin e arritur këtu”.

Në këtë takim është vlerësuar se roli i Mbretërisë së Bashkuar në rajon i kontribuon lirisë, demokracisë dhe progresit, andaj edhe duhet të jetë sa më aktiv.


MË SHUME NGA Lajme