Në tri komunat e veriut situata edhe më tej vazhdon të jetë e qetë
A.Berisha, E.Osmani.A.Sejda, A.Bela/ RTKlive
(E plotësuar, ora 13:35) Në tri komunat e veriut, Zveçan, Zubin Potok dhe Leposaviq, vazhdon të jetë e qetë
Gazetarët e RTK-së nga këto komuna raportojnë se deri në ora 13:00, nuk ka pasur asnjë incident dhe situata vazhdon të jetë e qetë.
Protestuesit lëshojnë këngë nacionaliste
Ndonëse situata në Komunën e Zobin Potokut paraqitet e qetë, serbët lokalë që nga mëngjesi kanë lëshuar këngë nacionaliste.
Gazetarja e RTK-së, Arbresha Berisha, raporton se në mesin e këngëve të lëshuara ka pasur edhe të atilla që kanë bërë thirrje për luftë. Bashkë me këto thirrje janë lëshuar edhe krisma armësh.
Situatë e qetë në veri të Mitrovicës
(E plotësuar, ora 11:47) Situatë e qetë po paraqitet edhe në veri të Mitrovicës përkatësisht përtej Urës së Ibrit. Gazetarja e RTK-së, Elmina Osmani, raporton se në këtë pjesë është një ditë e zakonshme dhe se pranë urës janë vendosur, Policia e Kosovës, Policia e EULEX-it dhe karabinierët italianë.

Në Zubin Potok dhe Zveçan situatë e qetë
(E plotësuar, ora 10:27) Në dy komunat e veriut, në Komunën e Zveçanit dhe të Zubin Potokut, gazetarët e RTK-së, raportojnë se situata tani për tani është qetë.
Situatë e qetë në Komunën e Zveçanit
Gazetarja e RTK-së, Elmina Osmani, raporton se aktualisht situatë e qetë po paraqitet në Komunën e Zveçanit. Sipas saj, tani ka rënë edhe numri i protestuesve. Pak më parë këtu janë deklaruar ish-zyrtarë të kësaj komune, të cilët kanë kërkuar që Policia e Kosovës të largohet nga objekti me arsyetimin se ata duan ti kthehen punës pasi që sipas tyre nuk kanë të ardhura të tjera as nga Serbia e as nga Kosova. 
Në Zubin Potok situata edhe më tej vazhdon të jetë e qetë
(E plotësuar, ora 10:00) Në Zubin Potok situata edhe më tej vazhdon të jetë e qetë. Protestuesit janë shpërndarë rreth objektit të komunës.
Gazetarja e RTK-së, Arbresha Berisha raporton se një pjesë e tyre vazhdojnë të qëndrojnë në tendat e ngritura ditë më parë. Ndërsa protestuesit kanë lëshuar këngë nacionaliste edhe sot.
(E plotësuar, ora 09:35) Edhe sot po vazhdon protesta në komunat e veriut të Republikës së Kosovës. Gazetarët e RTK-së, raportojnë se deri më tani situata raportohet të jetë e qetë.
Qytetarët serbë kanë nisur të mblidhen para komunës së Zubin Potokut. Gazetarja e RTK-së, Arbresha Berisha, raporton se forcat e Policisë së Kosovës dhe ato të KFOR-it edhe më tej po kujdesen për sigurinë në këtë komunë. Situata deri në këto momente paraqitet e qetë. 
Edhe në komunën tjetër atë të Zveçanit, një numër i konsiderueshëm i protestuesve janë mbledhë sërish pranë Komunës se Zveçanit. Gazetarja e RTK-së, Elmina Osmani, raporton se situata aktualisht është e qetë dhe se KFOR ka shtuar prezencën në këtë komunë, derisa edhe njësitet speciale të Policisë së Kosovës vazhdojnë të monitorojnë objektin e komunës. Raportohet se përfaqësues të Listës Serbe po vazhdojnë t’i mbështesin protestuesit.

Edhe sot vazhdojnë protestat në veri
Serbët në veri të Republikës së Kosovës edhe sot do të vazhdojnë protestën e tyre.
Protestat janë paralajmruar se do të mbahen në mbahen në Zveçan, Zubin Potok dhe Leposaviq.
Ndryshe dje shefi i Politikës së Jashtme të BE-së, Josep Borrell ka bërë të ditura tri kërkesat e BE-së pas takimit të sotëm të përbashkët të presidentes Vjosa Osmani dhe presidentit të Serbisë, Aleksandar Vuçiq, i cili u mbajt në Moldavi, me pjesëmarrjen edhe të presidentit të Francës, Emanuel Macron dhe kancelarit gjerman, Olaf Scholz.
“Kemi 3 kërkesa të qarta: - Zgjedhjet e reja lokale menjëherë; - Sigurimin e pjesëmarrjes së serbëve të Kosovës’ - Fillimin e punës për themelimin e Asociacionit të Komunave me Shumicë Serbe, në kuadër të Dialogut të lehtësuar nga BE-ja. Dështimi për ta bërë këtë, do të ketë pasoja të rënda në marrëdhëniet tona”, ka shkruar Borrell në “Twitter”.
Kurse presidentja Vjosa Osmani në një intervistë për RTK-në ka deklaruar se rruga ligjore për të ecur përpara ekziston.
“Në qoftë se dëshirojnë ekziston rruga ligjore për t’i organizuar ato shumë shpejt. I procedojnë peticionet e tyre dhe ne respektojmë ligjin tonë. Asgjë më shumë ne nuk po kërkojmë përveçse ligjshmëri dhe kushtetutshmëri në tërë territorin e Republikës së Kosovës. Por, kur shkaktohen zgjedhje të reja natyrisht është e rëndësishme që ata të participojnë, pra të marrin pjesë edhe si kandidatë, por në të njëjtën kohë edhe të marrin pjesë në zgjedhje dhe kështu sigurohet edhe legjitimiteti më i madh i të zgjedhurve”, ka thënë presidentja Osmani.























