Sekretari Blinken i kërkon Kurtit dhe Vuçiqit uljen e tensioneve në veri
BKT
Lajme

Sekretari Blinken i kërkon Kurtit dhe Vuçiqit uljen e tensioneve në veri

B.H. | RTKlive

Sekretari i Shtetit, Antony Blinken, ka deklaruar se SHBA-ja e përkrah planin trepikësh të BE-së për shtensionimin e situatës në veri të Kosovës.

Ai një gjë të tillë e bëri të ditur pas bisedave të mbrëmshme me kryeministrin e Kosovës, Albin Kurti dhe presidentin e Serbisë, Aleksandar Vuçiq.

“Sot kam folur me kryeministrin kosovar Albin Kurti për të kërkuar shtensionimin në veri të Kosovës dhe kthimin e menjëhershëm në dialogun e lehtësuar nga BE-ja. Plani trepikësh i BE-së është rruga përpara”, ka shkruar ai në orët e para të së martës në “Twitter”.

Ndërkaq sa i përket bisedës me presidentin serb, Sekretari amerikan ka thënë se ka folur për rëndësinë e uljes së menjëhershme të tensioneve, derisa e ka mirëpritur lirimin e tre policëve kosovarë nga autoritetet e Serbisë.

“Ne mirëpresim lirimin e sotëm të policëve të Kosovës dhe vazhdojmë të mbështesim fuqishëm planin trepikësh të BE-së si rrugën më të mirë përpara”, ka shkruar Blinken.

Plani trepikësh i BE-së parasheh shtensionimin e situatës, zgjedhjet e reja dhe rikthimin në dialog të Kosovës dhe Serbisë.


MË SHUME NGA Lajme