Osmani:Anëtarësimi i Kosovës në KiE, domosdoshmëri për të drejtat e njeriut
M.Sh/RTKlive
(E plotësuar 14.50) “Anëtarësimin e Kosovës në Këshillin e Evropës është jo vetëm prioritet i Republikës së Kosovës, por edhe domosdoshmëri për mbrojtjen e të drejtave të njeriut dhe mirëqenies së të gjithë qytetarëve, pa dallim”. Kështu ka deklaruar presidentja Vjosa Osmani në takim me Dora Bakoyannis, raportuese në Komisionin e Çështjeve Politike të Asamblesë Parlamentare të Këshillit të Evropës (APKE) për aplikimin e Kosovës për anëtarësim në Këshillin e Evropës.
Osmani ka shprehur mirënjohje për vizitën e raportueses Bakoyannis për përgatitjen e opinionit, i cili do ta shqyrtojë kërkesën e Kosovës për anëtarësim në Këshillin e Evropës, duke shfaqur besimin për një proces të drejtë dhe të bazuar në merita.
Sipas presidentes Osmani, Kosova ka inkorporuar Konventën Evropiane për Mbrojtjen e të Drejtave të Njeriut dhe dokumente të tjera ndërkombëtare në Kushtetutën e saj, duke siguruar të drejtat e të gjithë qytetarëve, përfshirë komunitetet joshumicë, sundimin e ligjit dhe qeverisjen demokratike, siç është dëshmuar edhe nga vlerësimi i disa organizatave ndërkombëtare.
“Kosova është e përkushtuar që t`i përmbushë të gjitha standardet e Këshillit të Evropës për anëtarësim. Kushtetuta e Kosovës veçse ka përfshirë konventat kyçe të Këshillit të Evropës duke i bërë ato të zbatueshme në Kosovë. Në këtë frymë, Kosova është e përkushtuar fuqimisht ndaj vlerave evropiane, duke përfshirë demokracinë, të drejtat e njeriut dhe sundimin e ligjit”, ka theksuar Osmani.
Presidentja në takim me raportuesen Bakoyannis ka nënvizuar se Kosova pret që debati dhe votimi i Opinionit për aplikimin e Kosovës të bëhet sa më parë në mënyrë që të procedohet edhe me votimin formal për anëtarësimin e saj nga Komiteti i Ministrave.
“Vitin e ardhshëm, Këshilli i Evropës do të shënojë 75 vjetorin e themelimit të tij. Kështu, do të ishte shumë simbolike që vetë Këshilli i Evropës, si organizata kryesore e të drejtave të njeriut në kontinentin tonë, të hapte derën për një vend demokratik, që aspiron t'i bashkohet familjes së vlerave”, ka thënë ndër të tjera Osmani.
Në këtë takim, Osmani e ka njoftuar raportuesen Bakoyannis edhe lidhur me sfidat aktuale me të cilat po përballet Republika e Kosovës, si dhe për aktin e agresionit të kryer nga ana e Serbisë me datën 24 shtator.
Osmani takon raportuesen e Asamblesë Parlamentare të Këshillit të Evropës
Presidentja e Kosovës Vjosa Osmani e ka pritur sot në takim raportuesen e Asamblesë Parlamentare të Këshillit të Evropës, Dora Bakoyannis.
Dora Bakojanis është raportuese për anëtarësimin e Kosovës në Këshillin e Evropës nga Komisioni për Çështje Politike dhe Demokraci në Asamblenë Parlamentare të Këshillit të Evropës, raporton RTKlive.
Bakojanis do të bëjë raportin gjithëpërfshirës konsultativ për komisionin për politikën dhe demokracinë, i cili shkon për miratim në seancën plenare të asamblesë parlamentare të KiE.
Dora Bakojanis ishte Ministre e Jashtme e Greqisë, si gruaja e parë në postin më të lartë në Greqi dhe me një karrierë të bujshme politike, gjë që e bën atë të njohë mirë rrethanat në Ballkan.























