Bakoyannis në MPJD, njoftohet nga Ahmeti për përgatitjet e Kosovës për KiE
Raportuesja për Kosovën në Asamblenë Parlamentare të Këshillit të Evropës, Dora Bakoyannis po qëndron në Kosovë, në një vizitë fakt-mbledhëse në kuadër të anëtarësimit të Republikës së Kosovës në Këshillin e Evropës. Ajo sot u prit nga zëvendësministri i Punëve të Jashtme dhe Diasporës, Kreshnik Ahmeti, i cili e njoftoi deputeten greke me përparimin e Kosovës në fushën e të drejtave të njeriut, demokracisë dhe në sundimin e ligjit.
Këto çështje, siç ka thnë Ahmeti, janë shtyllat bazë të parimeve dhe vlerave të Këshillit të Evropës.
Ai theksoi faktin që në vitet e fundit Kosova ka shënuar progres të dukshëm në të drejtat politike dhe civile të qytetarëve të saj e po ashtu në reformat e sistemit të drejtësisë, në koordinim të ngushtë më Komisionin e Venedikut.
“Këto zhvillime kanë bërë që organizatat e pavarura ndërkombëtare të rendisin Republikën e Kosovës si vendin më demokratik në rajon dhe të parin për reformat në drejtësi dhe sundim të ligjit”, deklaroi Ahmeti.
Gjithashtu, në takim u diskutua mbi kornizën kushtetuese dhe ligjore të Republikës së Kosovës, e cila është shembull për sa i përket të drejtave të komuniteteve pakicë.
Ahmeti po ashtu e njoftoi raportuesen Bakoyannis mbi themelimin e Grupit Ndërinstitucional për anëtarësimin e Republikës së Kosovës në Këshillin e Evropës, si dhe mbi punën e deritanishme në analizimin dhe përpjekjet për adresimin e rekomandimeve të dala nga raportet e Këshillit të Evropës drejtuar institucioneve të Kosovës.
Zëvendësministri Ahmeti falënderoi raportuesen Bakoyannis për vizitën e saj dhe u shpreh i kënaqur me ritmin e progresit të procesit të anëtarësimit përbrenda Asamblesë Parlamentare të Këshillit të Evropës, raporton MPJD.
Ai bëri thirrje që ky ritëm të vazhdojë, në mënyrë që Kosova t’i bashkohet sa më parë Këshillit të Evropës dhe që qytetarët e saj të përfitojnë nga mekanizmat e kësaj organizate, me theks të veçantë nga Gjykata Evropiane për të Drejtat e Njeriut.
Sipas MPJD-së, vizita fakt-mbledhëse e eurodeputetes Bakoyannis, si raportuese kryesore për përgatitjen e opinionit për anëtarësimin e Kosovës në Këshillin e Evropës, shënon një hap të rëndësishëm në procesin e anëtarësimit të Kosovës në këtë organizatë.
Kjo po ashtu i paraprinë vizitës së raportueseve nga dy Komitetet tjera përkatëse të Asamblesë Parlamentare të Këshillit të Evropës, Azadeh Rojhan dhe Béatrice Fresko-Rolfo, të cilat do të qëndrojnë në Kosovë në fillim të muajit dhjetor.
Pas votimit të raportit të Bakoyannis në njërën nga sesionet plenare të Asamblesë Parlamentare të Këshillit të Evropës, ministrat e punëve të jashtme të vendeve anëtare vendosin për ta ftuar Republikën e Kosovës si anëtare të plotë në Këshillin e Evropës, thuhet në njoftimin e MPJD-së, raporton RTKLive.























