Kurti: Paqja kërkon drejtësi për krimet e luftës
V.Th. RTKlive
Instituti për Hulumtimin e krimeve të kryera gjatë luftës, ka organizuar sot tryezë diskutimi me përfaqësuesit e institucioneve e organizatave, lidhur me hulumtimin e dokumentimin e krimeve të kryera gjatë luftës në Kosovë.
Kryeministri i Republikës së Kosovës, Albin Kurti, tha se po humbet kujtesa parësore e luftës dhe se ky është një rrezik i madh që i kanoset vendit, duke theksuar që nuk guxojmë ta lejomë të ndodhë.
Tutje Kurti tha se paqja kërkon drejtësi dhe rehabilitim për krimet e luftës, duke theksuar se krimet e luftës do të dokumentohen dhe adresohen.
Kurse drejtori i Institutit Atdhe Hetemi tha se qëllimi i Institutit është që të bashkëpunojë ngushtë me të gjithë ata që kanë interes në dokumentimin, hulumtimin dhe zgjerimin e njohurive rreth krimeve të kryera gjatë luftës në Kosovë.
Sipas Hetemit Instituti do ta ketë përkrahjen e pakursyer të institucioneve shtetërore, botës akademike, medieve, OJQ-ve, aktivistëve dhe qytetarëve të vendit
Tutje Hetemi shtoi se Instituti do të punojë në shërbim të paqes dhe drejtësisë, ku theksoi se instituti do të sigurohet se krimet e kryera gjatë luftës në Kosovë të mos kalohen pa u dokumentuar. “Kjo është detyrë e institutit karshi viktimave dhe shoqërisë në përgjithësi”, tha ai.
Ky ishte takimi i parë zyrtar të Institutit për dokumentimin e krimeve të kryera gjatë luftës në Kosovë.























