Themelohet komisioni hetimor për libra
BKT
Foto arkiv/ RTKlive
Lajme

Themelohet komisioni hetimor për libra

A.Bela / RTKlive

(E plotësuar, ora 17:30) Në seancën plenare të Kuvendit të Kosovës, e mbajtur sot nën kryesimin e kryeparlamentarit Glauk Konjufca, deputetët shqyrtuan disa nga pikat e rendit të ditës të parapara për sot.

Themelimi i Komisionit Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të Arsimit fillor dhe Arsimit të Mesëm të Ulët për vitin shkollor 2023/2024, ishte çështja për të cilën u diskutua në fillim të seancës.  

Arsyen për themelimin e këtij komisioni e paraqiti deputetja, Floretë Zejnullahu nga radhët e Grupit Parlamentar të PDK- së,  si iniciues i themelimit të komisionit. 

Pas kësaj, folën përfaqësuesit e grupeve parlamentare, ku u vunë re dallimet ndërmjet përfaqësuesëve të pozitës dhe atyre opozitarë. 

Lidhur me këtë foli edhe Arbërie Nagavci, ministre e Ministrisë së Arsimit, Shkencës, Teknologjisë dhe Inovacionit (MASHTI). 

Ajo u shpreh në favor të këtij komisioni hetimor, por, tha ajo, komisioni duhet të hetojë edhe ministritë paraprake. 

Në vijim të paraqitjes së saj me këtë rast, ministrja Nagavci, vuri në spikamë të arriturat dhe përpjekjet e ministrisë  për jetësimin e reformave të nisura. 

Lidhur me këtë, ajo vuri theksin te nevoja e miratimit të ligjeve nga fusha e arsimit, dhe u bëri apel deputetëve që t’i miratojnë ato. 

Pas shterimit të debatit, kryeparlamentari Konjufca, e hodhi në votim themelimin e komisionit, i cili me shumicë votash (57 sosh) u përkrah nga deputetët. 

Kryetar i komisionit u vendos që të jetë deputeti nga radhët e AAK-së, Shemsedin Dreshaj. 

Pas kësaj, në mungesë kuorumi, nuk u hodhën në votim një mori marrëveshjesh ndërkombëtare, ndërkaq, u shqyrtua Projekt Kodi doganor dhe akcizave, nr. 08/L-247, i cili, në mungesë kuorumi nuk u miratua.  

Po ashtu, në lexim të dytë u shqyrtuan edhe këto projektligje: Projektligji nr. 08/L-211 për Verëra, Projektligji nr.08/L-212 për shëndetin riprodhues dhe fertilizim të asistuar mjekësor, të cilat, po ashtu, në mungesë kuorumi nuk u arrit që të miratohen. 

Projektligji nr.08/L-258 për promovimin e përdorimit të burimeve të ripërtërishme të energjisë, siguroi votat e mjaftueshme për miratim në lexim të dytë, ndërkaq, nuk pati kuorum për miratim në lexim të parë të Projektligjit nr.08/L-266 për gjendjen civile, kuorum nuk kishte as për Projektligjin nr.08/L-268 për shpronësimin e pronës së paluajtshme, ndërkaq, u miratua në parim Projektligji nr.08/L-284 për shqyrtimin administrativ të akteve të komunave, Projektligji nr.08/L-285 për dhënien në shfrytëzim dhe këmbim të pronës së paluajtshme të komunës, si dhe Projektligji nr.08/L-291 për Gjykatën Administrative. 

--------------------------------------------------------------

Kuvendi do të shqyrtojë projekt-deklaratën për raportet Kosovë-SHBA

Sot do të mblidhet Kuvendi të Kosovës. Pikë e rendit të ditës është edhe shqyrtimi i Projekt-Deklaratës për raportet e Republikës së Kosovës me Shtetet e Bashkuara të Amerikës, si dhe votimi i disa marrëveshjeve ndërkombëtare.

Këto janë pikat e rendi të ditës: Themelimi i Komisionit Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të Arsimit fillor dhe Arsimit të Mesëm të Ulët për vitin shkollor 2023/2024, votimi i Projektligjit për ratifikimin e Marrëveshjes së kredisë për programin e financave publike dhe rritjes ekonomike ndërmjet Republikës së Kosovës dhe Fondit OPEC për Zhvillim Ndërkombëtar, votimi i Projektligjit për ratifikimin e Traktatit ndërmjet Republikës së Kosovës dhe Mbretërisë së Danimarkës për shfrytëzimin e institucionit korrektues në Gjilan me qëllim të ekzekutimit të dënimeve daneze,  votimi i Projektligjit për Aderimin e Republikës së Kosovës në Konventën për Importin e Përkohshëm, votimi i Projektligjit për ratifikimin e Marrëveshjes ndërkombëtare ndërmjet Kosovës nga njëra anë dhe Bashkimit Evropian nga ana tjetër për pjesëmarrjen e Kosovës në Programin e bashkimit programi i tregut të vetëm, votimi i Projektligjit për Ratifikimin e Marrëveshjes së Financimit ndërmjet Republikës së Kosovës, e përfaqësuar nga Ministria e Financave, Punës dhe Transfereve, dhe Asociacionit Ndërkombëtar për Zhvillim për projektin “Projekti për forcimin e qeverisjes digjitale për ofrimin e shërbimeve”, votimi i Projektligjit për ratifikimin e Marrëveshjes për sigurime sociale ndërmjet Republikës së Kosovës dhe Mbretërisë së Holandës, votimi i Projektligjit për  ratifikimin e Marrëveshjes ndërkombëtare ndërmjet Qeverisë së Kosovës, të përfaqësuar nga Ministria e Financave, Punës dhe Transfereve dhe Qeverisë së Konfederatës Zvicerane, të përfaqësuar nga Sekretariati shtetëror për çështje ekonomike për Projektin e “qëndrueshmërisë klimatike në sektorin e ujërave në Kosovë”, votimi i Projektligjit për  ratifikimin e Marrëveshjes së financimit në mes të Republikës së Kosovës, përfaqësuar nga Ministria e Financave, Punës dhe Transfereve, Korporata Energjetike e Kosovës (KEK), dhe KFË, Frankfurt Am Main, për Programin e energjisë solare I (solar4kosovo I) Fotovoltaik, votimi i Projektligjit për ratifikimin e Marrëveshjes ndërkombëtare,  për  pjesëmarrjen e Kosovës në programin e Bashkimit Evropian “Evropa digjitale për periudhën 2021-2027” ndërmjet Republikës së Kosovës dhe Bashkimit Evropian, shqyrtimi i Projektligjit për ratifikimin e Marrëveshjes ndërmjet Republikës së Kosovës dhe Bashkimit Evropian mbi pjesëmarrjen e Kosovës në Programin e BE-së qytetarët, barazia, të drejtat dhe vlerat, shqyrtimi i Projektligjit për ratifikimin e “amendamentimit nr.3 të Marrëveshjes financiare ndërmjet Republikës së Kosovës dhe Bashkimit Evropian për programin IPA 2015”.

Po ashtu në këtë seancë do të bëhet shqyrtimi i Projektligjit për ratifikimin e “Marrëveshjes së bashkëfinancimit për hartimin e Projektit për ndërtimin e tunelit në rrugën Tetovë-Prizren”, shqyrtimi i Projektligjit për ratifikimin e Marrëveshjes ndërmjet Republikës së Kosovës dhe Bashkimit Evropian për pjesëmarrjen e Kosovës në programin e Bashkimit Evropian “Drejtësia”, votimi në lexim të dytë i Projekt Kodit doganor dhe të akcizave,  votimi në lexim të dytë i Projektligjit për Verëra, votimi në lexim të dytë i Projektligjit për shëndetin riprodhues dhe fertilizim të asistuar mjekësor, shqyrtimi i dytë i Projektligjit për promovimin e përdorimit të burimeve të ripërtërishme të energjisë, votimi në parim i Projektligjit për gjendjen civile, votimi në parim i Projektligjit për shpronësimin e pronës së paluajtshme, shqyrtimi i parë Projektligjit për shqyrtimin administrativ të akteve të komunave, shqyrtimi i parë i Projektligjit për dhënien në shfrytëzim dhe këmbim të pronës së paluajtshme të komunës, shqyrtimi i parë i Projektligjit për Gjykatën Administrative, shqyrtimi i parë i Projektligjit për Inspektoratin qendror të mbikëqyrjes së tregut, shqyrtimi i parë i Projektligjit për mbrojtjen e konsumatorit, raporton RTKlive. Po ashtu kuvendi do të votojë edhe Programin Kombëtar të Shkencës 2023/2028.

Në rend dite janë edhe këto pika: Votimi për themelimin e Komisionit Hetimor Parlamentar mbi përgjegjësitë ekzekutive të Ministrisë së Drejtësisë në raport me zjarret e dyshimta në Institutin e Mjekësisë Ligjore, zhdukjen e mostrave në rastin e Astrit Deharit dhe çdo veprimi e mosveprimi të kësaj ministrie që ka cenuar pavarësinë dhe përgjegjësitë ligjore të këtij instituti, shqyrtimi i rekomandimeve nga mbikëqyrja e zbatimit të Ligjit për tregti me jashtë, shqyrtimi i Rekomandimeve lidhur me Raportin e auditimit të performancës “Prokurimet e negociuara pa publikim të njoftimit për kontratë në Ministrinë e Mjedisit, Planifikimit Hapësinor dhe Infrastrukturës për vitin 2021”, shqyrtimi i Rekomandimeve për Raportin e auditimit të performancës “Renovimi dhe konfigurimi i stadiumit të qytetit në Mitrovicë, Gjilan dhe Gjakovë”, shqyrtimi i Raportit vjetor të Ndërmarrjes Publike, Operatori i Sistemit, Transmisionit dhe Tregut, për vitin 2022, shqyrtimi i Projekt-Deklaratës për raportet e Republikës së Kosovës me Shtetet e Bashkuara të Amerikës, shqyrtimi i Projektrezolutës për vlerësimin e punës së Radiotelevizionit të Kosovës për vitin 2022, shqyrtimi i Projektrezolutës për vlerësimin e punës së Autoritetit të Konkurrencës i Republikës së Kosovës për vitin 2022, themelimi i Komisionit Ad-Hoc për përzgjedhjen e kandidatëve për një anëtar të Bordit të Radiotelevizionit të Kosovës, zgjedhja e anëtarëve të Bordit të Komisionit të Pavarur për Miniera dhe Minerale, zgjedhja e një anëtari të Këshillit Prokurorial të Kosovës, përfaqësues nga Oda e Avokatëve të Kosovës dhe shqyrtimi i Projekt-rezolutës për adresimin e çështjes së emigrimit të qytetarëve nga Republika e Kosovës.


MË SHUME NGA Lajme