Ministri izraelit: Sulmi nga Irani u pengua “në mënyrë mbresëlënëse”
RTKlive
(E plotësuar, ora 07:00) Ministri i mbrojtjes i Izraelit, Yoav Gallant ka thënë se ai ka përfunduar një vlerësim të situatës operacionale me anëtarë të lartë të institucionit të mbrojtjes të Izraelit dhe ka arritur në përfundimin se IDF-ja “e pengoi” sulmin nga Irani “në një mënyrë mbresëlënëse”.
Së bashku me Shtetet e Bashkuara dhe partnerë shtesë, ne arritëm të mbronim territorin e shtetit të Izraelit. U shkaktuan shumë pak dëme – ky është rezultat i operacioneve mbresëlënëse të IDF-së.
Gallant tha se ndërsa “fushata nuk ka përfunduar ende”, Izraeli “e pengoi valën më të rëndësishme [të sulmit] dhe ne e bëmë këtë me sukses”.
Izrael: Disa dronë e raketa erdhën nga Iraku dhe Jemeni
(E plotësuar, ora 6:30) Irani lëshoi më shumë se 300 dronë dhe raketa në Izrael - 99% e të cilave u rrëzuan, njoftoi ushtria izraelite.
Në një konferencë, zëdhënësi i Forcave të Mbrojtjes të Izraelit, Daniel Hagari tha gjithashtu se disa nga lëshimet gjatë natës ishin nga Iraku dhe Jemeni.
Mbrojtja ajrore e SHBA-së kap disa dronë iranianë që synonin Izraelin.
Sistemet e mbrojtjes ajrore amerikane në Lindjen e Mesme kanë kapur disa dronë iranianë, sipas dy zyrtarëve amerikanë, raporton CNN.
Burimet nuk specifikuan se si SHBA i përgjuan dronët dhe ku.























