Ndalimet në Serbi, njohësit e sigurisë: Vuçiq synon destabilizimin|Video
Arbresha Berisha/ RTK
Tendencë për destabilizim të situatës është vlerësuar veprimi i fundit i shtetit serb, për ndalimin e 4 zyrtarëve policorë bashkë me zëvendësdrejtorin e Policisë së Kosovës, edhe nga njohës të çështjeve të sigurisë. Sipas tyre, shteti serb po mundohet ta mbajë situatën nën tension, derisa kërkojnë që Bashkimi Evropian t`i vë sanksione Serbisë.
Si lojë politike të presidentit serb Aleksandër Vuçiq e tendencë për destabilizim, po vlerësohet veprimi i fundit i Serbisë për ndalimin e zëvendësdrejtorit të Policisë së Kosovës, bashkë me 4 zyrtarë tjerë policorë.
Sipas gazetarit serb, Branisllav Kërstiq, veprime të tilla, përveç se janë kundër interesave të qytetarëve shqiptarë, janë edhe kundër atij serb.
Njohësi i sigurisë, Arben Dashevci, thotë se Serbia po mundohet ta mbajë situatën nën tension, andaj edhe kërkon reagim ndërkombëtar.
Kjo nuk është hera e parë që qytetarët e Kosovës janë ndaluar nga autoritetet serbe me të hyrë në këtë shtet.
Ndërkohë, kryetarja e Kuvendit të Serbisë, Ana Bërnabiq, hapur ka përshëndetur arrestimet e kryera, duke lavdëruar anëtarët e Ministrisë së Punës së Brendshme të Serbisë, për prangosjen e, siç tha ajo, personave që po e minojnë rendin kushtetues të Serbisë.























