Kurti takon kryeministrin e Lihtenshtajnit, flasin për bashkëpunime
BKT
Lajme

Kurti takon kryeministrin e Lihtenshtajnit, flasin për bashkëpunime

E. Hoti / RTKlive

Pjesëmarrjen në Javën e Nivelit të Lartë të Asamblesë së Përgjithshme të Kombeve të Bashkuara, Kryeministri i Republikës së  Kosovës, Albin Kurti e filloi me takimin bilateral me Kryeministrin e Principatës së Lihtenshtajnit, Daniel Risch.

Sipas njoftimit nga ekzekutivi, ky takim në Nju Jork u zhvillua teksa në Prishtinë përfaqësues të dy qeverive po zhvillojnë raundin e katërt të diskutimeve rreth marrëveshjes për EFTA, për çka kryeministri u shpreh optimist për finalizimin e saj e që do të kontribuonte në rritjen e raporteve ekonomike dhe tregtare.

"Duke qenë përkrahëse e vazhdueshme ndaj proceseve integruese të Kosovës, kryeministri Kurti shprehu falënderimin e tij për mbështetjen e Lihtenshtajnit për anëtarësim në Këshillin e Evropës dhe në Bashkimin Evropian", thuhet në njoftim.

Në kuadër të fuqizimit të marrëdhënieve bilaterale, kryeministri Kurti dhe kryeministri Risch bashkë diskutuan edhe për mundësitë për lehtësimin e bashkëpunimit tregtar përmes eliminimit të tatimit të dyfishtë.  

Ky ishte takimi i parë ndërmjet dy kryeministrave.


MË SHUME NGA Lajme