Çadraku: Thaçi dhe Veseli nuk kishin aktivitete ushtarake
BKT
Gjykata Speciale

Çadraku: Thaçi dhe Veseli nuk kishin aktivitete ushtarake

Sh.Ç/RTKlive

(E plotësuar, ora 15:00) Në Dhomat e Specializuara të Kosovës në Hagë vazhdon të dëshmon dëshmitari Halil Çadraku në procesin gjyqësor ndaj ish-udhëheqësve të UÇK-së, Hashim Thaçit, Kadri Veselit, Rexhep Selimit dhe Jakup Krasniqit.

Dëshmitari Halil Çadraku tha se asnjëherë nuk ka parë në ndonjë shkrim që Hashim Thaçit dhe Kadri Veselit t’iu referoheshin si “gjeneral”. Sipas tij, kjo dëshmon që nuk kanë pasur aktivitet ushtarak dhe operacional gjatë luftës. Sipas tij, detyra e Thaçit dhe Veselit ishte që të kontaktonin me strukturat ndërkombëtare.

“Që 25 vjet, shtypi kosovar është i mbingarkuar me lloj-lloj shkrimesh si pozitive, si negative. Në asnjë gazetë si të kundërshtarëve e si të tonat, nuk kam lexuar t’i thuhet Hashim Thaçit, ‘Gjeneral Hashim Thaçi’. Në asnjë libër apo gazetë nuk kam parë t’i thuhet ‘Gjeneral Kadri Veseli’. Kjo e dëshmon që ata nuk kishin aktivitet të tyre ushtarak-operacional të tyre gjatë luftës së ’98-99, por kishin më shumë detyra të tyre të kontaktonin me strukturat ndërkombëtare”, ka deklaruar Çadraku.

Ai ka thënë se këto i bazon në ato që ka parë dhe dëgjuar dhe si informacione nuk i ka nga Shtabi i Përgjithshëm.

 Gjatë seancës Çadraku ka thënë se sa i takon periudhës së majit dhe qershorit 1998, Shtabi i Përgjithshëm nuk ka mundur që të bëjë organizime të strukturës së Ushtrisë Çlirimtare të Kosovës.

Ai këtë deklarim e bëri në gjykimin ndaj ish-krerëve të UÇK-së, duke u përgjigjur në pyetjet e gjyqtarit Christoph Barthe.

“Shtabi i Përgjithshëm nuk ka mundur të organizojë të gjitha organizimet nëpër fshatra, nëpër terrene, por gjithmonë ka pasur një njeri. Unë mund ta marr shembull vetëm veten dhe atëherë të nisemi nga kjo që mund të kuptojmë se ndoshta kështu ka mund të ndodhë edhe nëpër vende të tjera”, ka theksuar ai.

Ai u pyet se a e din nëse Thaçi dhe Veseli kanë punuar për organizimin e UÇK-së, duke bërë ndërlidhje në mes Shtabit të Përgjithshëm dhe të tjerëve që ishin jashtë Kosovë gjatë periudhës para luftës. Dëshmitari tha se nuk ka njohuri lidhur me këtë çështje.

Dëshmitari Halil Çadraku gjatë dëshmisë në Hagë ka thënë se mendon që pozitën e Inspektorit të Përgjithshëm të Ushtrisë Çlirimtare të Kosovës e ka mbajtur, Rexhep Selimi. Por ka theksuar se kurrë në këtë drejtim nuk ka kontaktuar me Rexhep Selimin.

“Më kujtohet se kam dëgjuar që për Inspektor të Përgjithshëm ka qenë zoti Rexhep Selimi. Kurrë nuk kam kontaktuar në këtë drejtim apo të mendoj se ka qenë post apo ashtu ne e kemi quajtur, por kujtoj se në këtë emërim në Inspektorin e Përgjithshëm të Shtabit të UÇK-së, ka qenë Rexhep Selimi”, ka thënë dëshmitari.

Ai ka thënë se nuk ka njohuri se kur është emëruar në këtë post Selimi dhe as në ndonjë post tjetër ndonjëri prej anëtarëve tjerë të Shtabit të Përgjithshëm. Gjithashtu ka theksuar se edhe njohuria për pozitën e Selimit nuk është informacion i dorës së parë.

Vazhdon dëshminë Halil Çadrakut në rastin ndaj ish-krerëve të UÇK-së

Ekipet e mbrojtjes njoftuan se nuk kanë pyetje për këtë dëshmitar, duke përshirë edhe mbrojtjen e Krasniqit. Kurse, pyetje shtesë për dëshmitarin pati prokurori James Pace.

Dëshmitari kishte thënë se Ilmi Reçica dhe Ferat Shala ishin homologet e tij për zonën e Drenicës dhe atë të Nerodimës e që nuk e dinte se çfarë pune bënin ata. 

Ndërsa, sipas prokurorit, dëshmitari kishte thënë se këta dy persona ose kanë qenë zëvendës të Veselit ose anëtarë të ekipit të tij.

“Unë mendoj që këtë deklaratë e kam dhënë në vitin 2019 pranë ZPS-së. 20 vite pas luftës edhe njohuritë e mija me Ilmi Reçicën dhe Ferat Shalën, tani i njoh por nuk me kujtohet konkretisht se kur i kam parë ata dy. Mund të kem thënë se mendoj për shkak se ata pas luftës kanë punuar si bashkëpunëtor ë Kadri Veselit, ashtu kam dëgjuar. Mendoj që në këtë kontekst e kam thënë. Mirëpo, gjatë luftës e kam thënë dhe e them se unë nuk jam takuar, nuk kam bashkëpunuar, nuk kemi dhënë urdhra ose marrë në bazë të sektorit”, ka deklaruar Çadraku.

Këtu ndërhyri edhe avokati kujdestar i Çadrakut, Arianit Koci i cili kërkoi që pyetjet të iu shfaqen në ekran edhe në gjuhën shqipe përveç asaj në gjuhën angleze.

Pasi dëshmitari e sqaroi deklaratën e tij për ZPS-në, kjo e fundit nuk pati pyetje më për dëshmitarin.

Në fillim të seancës, mbrojtja e Veselit kundërshtoi përdorimin e disa dokumenteve si dhe pranimin e tyre në prova.

Një ndër këto dokumente ishte edhe deklarata e Ferat Shalës që sipas avokatit i njëjti nuk është thirrur për të dëshmuar ose dëshmia e tij nuk është pranuar përmes ndonjë rregullore ‘lex specialist’.

Kryegjyqtari tha se asnjë palë nuk e ka parashtruar këtë deklaratë të Ferat Shalës për t’u pranuar në prova materiale. Ndërsa, avokati Dixon tha se mund të kërkohet ndërkohë. Megjithatë për këtë çështje, kryegjyqtari tha se do të merret me vonë vendimi.


MË SHUME NGA Gjykata Speciale