Kurti pret delegacionin nga Iowa: Shembull i bashkëpunimit ushtarako-civil
BKT
Në Fokus

Kurti pret delegacionin nga Iowa: Shembull i bashkëpunimit ushtarako-civil

RTKlive

Kryeministri në detyrë i Republikës së Kosovës, Albin Kurti, ka mirëpritur sot në ndërtesën e Qeverisë një delegacion nga shteti amerikan i Iowa-s, i përbërë nga akademikë, ndërmarrës dhe ushtarakë, të udhëhequr nga Gjeneralmajori në pension Timothy Orr dhe Kryetarja e qytetit Johnston, Paula Dierenfeld.

Sipas njoftimit të Qeverisë së Kosovës, kryeministri Kurti u shpreh i lumtur për bashkëpunimin e gjerë ndërmjet Republikës së Kosovës dhe shtetit të Iowa-s, duke theksuar se ky bashkëpunim ka qenë i pranishëm “që nga ditët e para të çlirimit e deri më sot”. Ai shprehu mirënjohje për ndihmën dhe përkrahjen që shteti i Iowa-s i ka dhënë Kosovës, si dhe për mbështetjen e vazhdueshme.

Kurti vlerësoi lart marrëdhëniet me SHBA-të në fusha kyçe si mbrojtja, diplomacia dhe zhvillimi, duke veçuar bashkëpunimin me Iowa-n si “të jashtëzakonshëm në këto drejtime”.

Një mirënjohje e veçantë iu drejtua Gjeneralit Orr për kontributin e tij në forcimin e lidhjeve Kosovë–Iowa. “Ideja e gjeneralit Orr për programin ‘E gjithë Iowa për të gjithë Kosovën’, në kuadër të Bashkëpunimit Civil, po funksionon shumë mirë dhe përbën shembullin më të mirë se si bashkëpunimi ushtarako-civil mund të ndihmojë në ndërtimin e një demokracie funksionale dhe progresin ekonomik të vendit tonë”, tha kryeministri Kurti, duke nënvizuar rëndësinë e respektimit të sundimit të ligjit dhe parimeve të ekonomisë së tregut të lirë.

Gjatë takimit u diskutua për bashkëpunimin e deritanishëm si dhe për mundësitë e reja në fushat e mbrojtjes, arsimit dhe qeverisjes lokale.

Në emër të delegacionit amerikan, gjenerali Orr dhe kryetarja Dierenfeld falënderuan kryeministrin Kurti dhe Qeverinë e Kosovës për mikpritjen dhe bashkëpunimin e vazhdueshëm.

Në takim morën pjesë edhe ministri në detyrë i Mbrojtjes, Ejup Maqedonci, dhe zëvendësministrja në detyrë e Punëve të Jashtme dhe Diasporës, Liza Gashi.


MË SHUME NGA Në Fokus