Dështon sërish konstituimi i legjislaturës së nëntë
BKT
Lajme

Dështon sërish konstituimi i legjislaturës së nëntë

Sh.Ç /RTKlive

(Përditësuar, 11:25) Ka dështuar për herë të 47-të përpjekja për konstituimin e legjislaturës së nëntë të Kuvendit të Kosovës.

Edhe këtë herë kryesuesi i seancës, Avni Dehari hodhi në votim Komisionin për Votim të Fshehtë, i cili mori 51 vota për nga 105 deputetë në sallë, derisa asnjë nuk ishte kundër e asnjë nuk abstenoi. Si rrjedhojë, në mungesë kuorumi seanca u ndërpre për të vazhduar pas 48 orësh.

Kuvendi për herë të 47-të tenton konstituimin e legjislaturës së nëntë

Deputetët e zgjedhur të Kuvendit të Kosovës do të mblidhen për herë të 47-të në një përpjekje tjetër për ta konstituuar legjislaturën e nëntë, të dalë nga zgjedhjet parlamentare të mbajtura më 9 shkurt. Vazhdimi i senacës konstrituive do të fillon në orën 11:00.

Të dielën ka dështuar edhe përpjekja e 46-të për konstituimin e legjislaturës së nëntë të Kuvendit të Kosovës.

Kryesuesi i seancës, Avni Dehari ka kërkuar nga subjektet politike që nuk kanë propozuar emër për anëtarë të Komisionit për Votim të Fshehtë për zgjedhjen e kryeparlamentarit që ta bëjnë një gjë të tillë, por si zakonisht ata kanë refuzuar.

Në vend të propozimit, ata në foltore kanë kërkuar nga kryesuesi që t’i kthehet pikës së rendit të ditës, por fjalimet e tyre janë ndërperë nga regjia me kërkesë të kryesuesit, pasi në seancën konstituive nuk lejohet debati.

Në votimin e Komisionit për Votim të Fshehtë nga 85 deputetë të pranishëm, për votuan 43 deputetë, derisa nuk pati as vota kundër e as abstenim, pasi pjesa tjetër e deputetëve si zakonisht deri më tash, nuk morën pjesë në votim.

Procesi i konstituimit po vazhdon të mbetet i bllokuar në pikën kyçe të zgjedhjes së kryetarit të Kuvendit, çka ka pamundësuar vazhdimin e rregullt të punës së këtij institucioni për më shumë se katër muaj.

Ky ngërç politik ka ndikuar drejtpërdrejt në paralizimin e punës së institucionit legjislativ, ndërsa qytetarët dhe shoqëria civile kanë shprehur shqetësim për mungesën e vullnetit politik për të gjetur zgjidhje.


MË SHUME NGA Lajme