Bizneset me thirrje për pezullim të vendimit për ndërprerje të energjisë
BKT
Lajme

Bizneset me thirrje për pezullim të vendimit për ndërprerje të energjisë

V.S/RTKlive

Takim të përbashkët me bizneset kanë zhvilluar Dhoma e Tregtisë dhe Industrisë e Kosovës, Oda Ekonomike Gjermano-Kosovare dhe Oda e Hotelerisë dhe Turizmit të Kosovës aty ku është diskutuar çështja e furnizimit me energji elektrike për bizneset që kanë dalë në treg të lirë.

Në njoftimin që ka përcjellë Dhoma e Tregtisë e Industrisë, thotë se drejtuesi i tyre Skënder Krasniqi, ka përmendur hapat e ndërmarrë deri më tani, edhe letrat që thonë se i kanë dërguar Komisionit Evropian, Sekretariatit për Energji në Vjenë dhe Zyrës së BE-së në  Kosovë.

“Përkundër kërkesave të vazhdueshme dhe prezantimit të fakteve për një numër të madh të shkeljeve nga ZRRE, Qeveria e Kosovës nuk ka ndërmarrë asnjë veprim që t’u gjendet bizneseve, të cilat mbushin mbi gjysmën e buxhetit të shtetit”, thotë DHTIK.

Ndërkohë bëhet e ditur se drejtori i Odës Ekonomike Gjermano-Kosovare, Besnik Vasolli ka thënë se procesi është përcjellë e po vazhdon të përcillet me paqartësi të shumta, derisa, sipas tyre, ai ka përmendur faktin se bizneset që janë furnizuar gjatë dy muajve të fundit me energji nga KEK-u, nuk kanë marrë faturat e energjisë.

DHTIK thotë se Hysen Sogojeva nga Oda e Hotelerisë dhe Turizmit,  shprehu mbështetjen e vazhdueshme në kundërshtim të veprimeve, siç ka thënë ai, të dëmshme të ZRRE-së.

“Në këtë takim konsultativ, drejtuesit e bizneseve kanë shprehur shqetësimin për mungesë të informatave, pasigurisë për të ardhmen e tyre dhe veprimeve të KEK-ut, që po i largon orët aktuale të rrymës dhe po i vendos të vetat pa asnjë njoftim”, thuhet tutje në njoftimin e DHTIK.

Ata kanë ripërsëritur qëndrimin e tyre se askush nuk është kundër liberalizimit të tregut të lirë të energjisë. “Por, se paqartësitë, mungesa e informatave, tregu i pa përgatitur, vërtetuar edhe nga instancat ndërkombëtare, e bëjnë këtë proces të dyshimtë dhe dëmtues  për ekonominë”, thotë DHTIK.

Ata i kanë bërë thirrje Qeverisë së Kosovës, ZRRE-së dhe KEK-ut që të pezullojnë ndërprerjen e furnizimit me energji elektrike dhe të rishqyrtohet i gjithë procesi i liberalizimit të tregut.


MË SHUME NGA Lajme