Gjykata Themelore shpall sot aktgjykimin ndaj Millosh Pleskoviqit
BKT
Lajme

Gjykata Themelore shpall sot aktgjykimin ndaj Millosh Pleskoviqit

RTKlive

Gjykata Themelore në Prishtinë pritet të shpallë këtë të enjte aktgjykimin ndaj Millosh Pleskoviqit, i akuzuar për krime lufte kundër popullsisë civile gjatë luftës në Kosovë, përkatësisht në qytetin e Prizrenit.

Sipas aktakuzës së ngritur nga Prokuroria Speciale e Republikës së Kosovës më 7 qershor 2024, Pleskoviq ngarkohet me përgjegjësi penale për ngjarjet e datës 1 shtator 1998, ku dyshohet se, në bashkëkryerje me një grup të armatosur prej 7-8 personash të nacionalitetit serb, ka marrë pjesë në vrasjen e tre civilëve shqiptarë – R.D., B.D. dhe F.B. – si dhe në plagosjen e tre të tjerëve: Fevzi Cana, Xhenger Cana dhe Bashkim Kastrati.

Ngjarja ka ndodhur në zonën e Prizrenit, ku viktimat, sipas hetimeve, po përpiqeshin të largoheshin drejt maleve kur janë ndaluar nga grupi i armatosur. Sipas përshkrimit të prokurorisë, pas ndalimit dhe fyerjeve verbale në gjuhën serbe, Pleskoviq, i identifikuar si pjesëtar i grupit, ka shtënë me armë zjarri të llojit “Kallashnikov”, duke shkaktuar vdekjen e menjëhershme të tre civilëve.

Sipas të dhënave të aktakuzës, trupat e viktimave janë kthyer te familjarët pas një jave dhe në gjendje të rëndë fizike. Në mesin e dëshmive, përmenden plagë të rënda dhe dëmtime të mëdha trupore në trupat e të ndjerëve.


MË SHUME NGA Lajme