As Hekuran Murati nuk i merr votat e mjaftueshme për kryeparlamentar
BKT
Në Fokus

As Hekuran Murati nuk i merr votat e mjaftueshme për kryeparlamentar

Sh.Ç|RTKlive

(Plotësuar 11:32) Ministri në detyrë i Financave, Punës dhe Transfereve, Hekuran Murati nuk ka arritur të marrë votat e mjaftueshme për kryeparlamentar.

Ai në përpjekjen e 56-të të seancës konstituive të Kuvendit të Kosovës është propozuar në emër të Lëvizjes Vetëvendosje nga Donika Gërvalla, e cila ka dhënë edhe arsyetimet e kësaj kandidature. Megjithatë, edhe kësaj radhe nuk u arrit kuota e 61 votave.

Nga 115 deputetë të pranishëm për kandidaturën e Muratit votuan 57 deputetë, kundër 52 dhe 6 deputetë kanë abstenuar.

Pasi ka kumtuar rezultatin e votimeve për kandidaturën e Muratit, kryesuesi i seancës, Avni Dehari e ka ndërprerë seancën, duke bërë të ditur se përpjekja e radhës do të jetë të dielën, në orën 11:00.

Në fillim të seancës ai ka sqaruar se në përpjekjen e kaluar gjatë votimit të kandidates së propozuar nga LVV, Donika Gërvalla është bërë një gabim. “Në votim kanë marrë pjesë 115 deputetë e jo 116, prandaj rezultati i votimit për Donika Gërvallën është 56 për, 56 kundër dhe 3 abstenime”, ka sqaruar ai.

Vazhdon seanca konstituive e Kuvendit, pa marrëveshje politike

Kuvendi i Kosovës do të mblidhet sërish sot, në orën 11:00, për të vazhduar seancën konstituive, në përpjekje për të zgjedhur kryetarin e ri.

Vazhdimi i kësaj seance vjen pas dështimit për të zgjedhur kryeparlamentarin të mërkurën, ku Lëvizja Vetëvendosje, si partia me më së shumti deputetë, propozoi fillimisht Albulena Haxhiun, e më pas Donika Gërvallën për kryetare të Kuvendit, por asnjëra prej tyre nuk arriti të sigurojë shumicën e nevojshme të votave për t’u zgjedhur.

Të mërkurën në emër të LVV-së, Glauk Konjufca propozoi fillimisht Albulena Haxhiun për kryeparlamentare. Në votimin e hapur, 57 deputetë votuan për, 56 kundër dhe 3 abstenuan. Më pas, Konjufca propozoi edhe kandidaten e dytë – Donika Gërvallën. Edhe në këtë rast, rezultati ishte i njëjtë: 57 vota për, 56 kundër dhe 3 abstenime.

Ngërçi në zgjedhjen e kryetarit të Kuvendit ka vonuar procesin e konstituimit të plotë të institucioneve pas zgjedhjeve, duke thelluar kështu krizën institucionale në vend.


MË SHUME NGA Në Fokus