Osmani: Bisedë përmbajtësore me presidentin Trump
BKT
Lajme

Osmani: Bisedë përmbajtësore me presidentin Trump

E.Hoti/RTKlive

Presidentja e Kosovës, Vjosa Osmani, ka zhvilluar një takim të gjatë dhe përmbajtësor me  presidentin e Shteteve të Bashkuara, Donald Trump.

Në një postim në rrjete sociale, Osmani ka deklaruar se takimi i planifikuar si protokollar është shndërruar në një bisedë të gjatë dhe shumë përmbajtësore, me theks të veçantë mbi rolin e pazëvendësueshëm të SHBA-së në Kosovë dhe rajon.

“Faleminderit Presidentit Trump për interesimin e veçantë që tregoi rreth rolit të pazëvendësueshëm të Amerikës në Kosovë dhe në rajonin tonë, si dhe për angazhimin e tij të palodhshëm për paqe!”, ka shkruar presidentja Osmani.

Ajo theksoi se miqësia dhe aleanca me Shtetet e Bashkuara mbetet boshti i pathyeshëm i shtetit të Kosovës.

“Kosova do të jetë gjithmonë në anën e demokracisë, lirisë dhe partneritetit me SHBA-të, sepse pikërisht aty rreh zemra e lirisë sonë”, ka shkruar ajo në Facebook.

Osmani po qëndron në Nju Jork ku po merr pjesë në margjinat e Asamblesë së Përgjithshme të Kombeve të Bashkuara.

Më 23 shtator, në pritjen e organizuar nga presidenti Trump, Osmani u takua edhe me sekretarin amerikan të Shtetit, Marco Rubio.


MË SHUME NGA Lajme