Trepça mposht Bashkimin në derbi dhe shkëputet në krye të Superligës
Uran Krasniqi / RTKLive
Kampionia e Kosovës në basketboll, Trepça, ka vazhduar formën e mirë duke triumfuar në derbin e javës së 17-të të ProCredit Superligës ndaj Bashkimit me rezultat 90:81, në palestrën “Minatori” në Mitrovicë.
Ndeshja ka qenë e luftuar nga të dyja skuadrat, por në fund vendasit kanë arritur të sigurojnë fitoren e tetë rresht, duke u shkëputur edhe më shumë në krye të tabelës. Trepça tani kryeson me tridhjetë e një pikë, me katërmbëdhjetë fitore dhe tri humbje, ndërsa Bashkimi mbetet me njëzet e tetë pikë, pas njëmbëdhjetë fitoreve dhe gjashtë humbjeve.
Pjesa e parë e ndeshjes ka qenë e baraspeshuar. Trepça e ka fituar çerekun e parë 28:19, ndërsa Bashkimi ka reaguar në periudhën e dytë duke e fituar 25:19. Diferenca është krijuar në çerekun e tretë, të cilin “xehetarët” e kanë fituar 26:17. Çereku i fundit i ka takuar Bashkimit (20:17), por pa arritur ta rrezikojë fitoren e vendasve.
Te Trepça, më i dalluari ka qenë Akil Vining me njëzet e tri pikë, nëntë asistime dhe dy kërcime. Lojë të mirë ka zhvilluar edhe Mikaile Tmushiq me gjashtëmbëdhjetë pikë, gjashtë kërcime dhe dy asistime. Me nga gjashtëmbëdhjetë pikë është kontribuuar edhe nga Kenny Hasbrouck, ndërsa Mustapha Amzil ka shtuar katërmbëdhjetë pikë.
Te Bashkimi, më efikasi ka qenë TJ Bickerstaff me tetë pikë dhe tetë kërcime, ndërsa Shanon Shorter dhe Isaiah Cousins kanë realizuar nga trembëdhjetë pikë, por që nuk kanë mjaftuar për ta shmangur humbjen.
Kjo fitore konfirmon formën e mirë të Trepçës, e cila në mesjavë siguroi edhe kualifikimin në gjysmëfinale të Kupës së Kosovës, pasi eliminoi Golden Eagle Yllin. Në gjysmëfinale të Kupës ka avancuar edhe Bashkimi, pas dy fitoreve çerekfinale ndaj GO+ Pejës.























