Reali ‘rrëzon’ Benficën, kualifikohet edhe PSG
Fatmir Bytyqi/RTKLive
(E përditësuar, 23:03) Real Madrid ka siguruar kualifikimin në 1/8 e finales së Ligës së Kampionëve, pasi mposhti Benficën edhe në ndeshjen kthyese të fazës së play-off-it.
‘Los Blancos’ triumfuan me rezultat 2-1 në “Bernabeu”, duke vulosur kalimin tutje me rezultat të përgjithshëm 3-1.
Skuadra portugeze e nisi më mirë takimin dhe kaloi në epërsi në minutën e 14-të me golin e Rafa Silvës, për 0-1. Megjithatë, reagimi i madrilenëve ishte i menjëhershëm, pasi Aurelien Tchouameni barazoi shifrat në 1-1 vetëm dy minuta më vonë, rezultat me të cilin u mbyll pjesa e parë.
Në fraksionin e dytë, madrilenët kontrolluan më mirë lojën, ndërsa goli i fitores erdhi në minutën e 80-të, kur Vinicius Junior realizoi për 2-1, duke i dhënë fund dilemave rreth fituesit të këtij dueli.
Me këtë rezultat, Real Madrid avancon në rundin tjetër të garës elitare evropiane, ndërsa Benfica, e drejtuar nga Jose Mourinho, e përfundon këtu aventurën në Evropë për këtë sezon.
Kualifikimin në mesin e 16 më të mirave e ka siguruar edhe Paris Saint-Germain, që në sfidën kthyese barazoi 2-2 ndaj Monaco, por me rezultat të përgjithshëm 5-4 kalon në fazën tjetër të Ligës së Kampionëve.
Ndërkohë, përballja mes Juventus dhe Galatasaray ka shkuar në vazhdime. Ndeshja në kohën e rregullt përfundoi me fitoren 3-0 të torinezëve, të cilët arritën të përmbysin disavantazhin nga takimi i parë. Skuadra që do të sigurojë kualifikimin do të përcaktohet në vazhdime ose përmes penalltive.
Shënon Vinicius, Reali në epërsi ndaj Benficës
(E përditësuar, 22:45) Real Madridi është afër kualifikimit në rundin tjetër të Ligës së Kampionëve pasi tashmë ka shënuar edhe golin e dytë kundër Benfica-s.
‘Los Blancos’ dhe skuadra portugeze po përballen në ‘Bernabeu’, në duelin kthyese të fazës së play-off-it në Ligën e Kampionëve.
Është sulmuesi Vincius, i cili në minutën e 80-të realizoi gol për rezultatin 2-1.
Dy gola të shpejta në duelin Real-Benfica
(E përditësuar, 21:20) Dy gola të shpejta kanë ardhur në ndeshjen Real Madrid-Benfica.
‘Los Blancos’ dhe skuadra portugeze po përballen në ‘Bernabeu’, në duelin kthyese të fazës së play-off-it në Ligën e Kampionëve.
Fillimisht Benfica e ka shtangur Real Madridin duke kaluar në epërsi prej 1-0.
Ishte Rafa Silva, i cili në minutën e 14-të heshti Madridin duke kaluar në avantazh skuadrën portugeze prej 1-0.
Mirëpo, gëzimi i skuadrës mysafire ishte i shkurtër pasi Touchameni (16’), barazoi shifrat në 1-1.
Nis superpërballja Real-Benfica, LIVE në RTK
Ka startuar superpërballja mes Real Madridit dhe Benfica-s, ndeshje që mund ta ndiqni në RTK.
‘Los Blancos’ dhe skuadra portugeze po përballen në ‘Bernabeu’, në duelin kthyese të fazës së play-off-it në Ligën e Kampionëve.
Madrilenët hyjnë në këtë ndeshje me epërsinë prej 1-0, të arritur një javë më parë në Lisbonë, megjithatë të besuarit e Jose Mourinhos në ‘Bernabeu’ do të zbresin me synim përmbysjen e rezultatit të duelit të parë.























