Katër të arrestuar në Hajkobillë për kontrabandë dhe armë
Em
Gjatë një operacioni të zhvilluar më 26 mars 2026 në vijën kufitare me Serbinë, në rajonin e fshatit Hajkobillë, Policia e Kosovës ka njoftuar se arrestuar katër persona të dyshuar për tri vepra penale: kontrabandë me mallra, kalim i paautorizuar i vijës kufitare dhe mbajtje e paautorizuar e armëve të zjarrit dhe municionit.
Sipas njoftimit, ekipet patrulluese nga Stacioni Policor për Mbikëqyrje të Kufirit, pas një vëzhgimi disa orësh, rreth orës 18:00 kanë vërejtur lëvizjen e tre traktorëve nga territori i Serbisë drejt Kosovës.
” Të njëtit janë ndaluar nga ana e zyrtarëve policorë, gjersa në afërsi të vijës kufitare është hasur një sasi e konsiderueshme e druve (trupakave) të kontrabanduara nga territori i Serbisë”, ka njoftuar Policia.
Me autorizim të prokurorit të Shtetit, policia kreu edhe bastisjen e një shtëpie në afërsi të kufirit, e dyshuar si bazë e kontrabandistëve, ku janë gjetur armë ilegale.
“Si prova materiale janë sekuestruar 3 traktorë me tërheqje, 3 pushkë gjuetie, 1 pushkë ajrore si dhe 83 fishekë të kalibrave të ndryshëm”, thuhet në njoftim .
Katër personat e dyshuar janë ndaluar për 48 orë ndërsa rasti për procedura të mëtejme do të trajtohet nga njësitë kompetente të Policisë së Kosovës dhe Doganës së Kosovës.























