‘Bologna-Aston Villa, do të vendoset nga detajet e vogla’
BKT
Sport

‘Bologna-Aston Villa, do të vendoset nga detajet e vogla’

Fatmir Bytyqi/RTKLive

“Përballja mes Bologna-s dhe Aston Villës do të jetë një ndeshje e fortë dhe që do të vendoset nga detajet e vogla".

Kështu vlerësojnë analistët e RTK-së, Rafet Prekazi dhe Muhamet Dragusha, në emisionin dedikuar Europa League.

Ky duel konsiderohet si kryesfida e çerekfinaleve të ligës së dytë më të rëndësishme në Evropë dhe do të transmetohet në RTK.

Bologna pret Aston Villën në shtëpi, në një përballje që pritet të jetë e hapur dhe e ekuilibruar.

Analisti dhe trajneri i njohur Rafet Prekazi vlerëson se ndeshja do të vendoset nga nuancat e vogla.

“Kjo lojë është e nivelit të lartë. Taktika është e sofistikuar, por në këso ndeshjesh vendosin detajet e vogla. Aston Villa është ekip më kompakt, qarkullon topin dhe kontrollon lojën, ndërsa Bologna luan bukur për sy, por shënon pak gola. Kërkohet qarkullim më i shpejtë i topit dhe kujdes në detajet e vogla,” tha ai.

Edhe trajneri Muhamet Dragusha parashikon një sfidë të fortë mes Bolgna-s dhe Aston Villës.

Sipas tij, trajneri i skuadrës angleze, Unai Emery tashmë ka dëshmuar së është një ekspert i kësaj garë evropiane.

“Trajneri i Aston Villës ka shkëlqyer në këtë garë. Aston Villa aktualisht është e pesta në Premier League, ndërsa Bologna në vendin e tetë, dhe Europa League mbetet shansi i tyre për objektivat e sezonit. Italianët do të përdorin kundërsulmin si armë kryesore, por mendoj se Aston Villa do ta thotë fjalën e fundit, edhe pse Bologna kërkon një rezultat të favorshëm për ndeshjen kthyese,” deklaroi Dragusha.

Ndeshja Bologna-Aston Villa nis sot në orën 21:00.