Hoxha në Samitin e Diasporës: Ruajtja e gjuhës, ADN-ja e identitetit tonë
RTSH
(E plotësuar) Ministri për Evropën dhe Punët e Jashtme i Shqipërisë, Ferit Hoxha, në fjalën hyrëse në Samitin e IV të Diasporës, theksoi rolin thelbësor të diasporës shqiptare si pjesë e pandashme e identitetit kombëtar, duke vënë theks të veçantë te rëndësia e ruajtjes së gjuhës shqipe.
Në fjalimin e tij, Hoxha u ndal te vlera e gjuhës si një element themelor i identitetit, duke e cilësuar atë si “ADN-në tonë, kujtesë, identitet dhe vazhdimësi”. Ai theksoi se përpjekjet për ruajtjen dhe zhvillimin e gjuhës shqipe janë përpjekje për të ruajtur vetë qenien kombëtare.
Ministri nënvizoi se përgjegjësia për ta mbrojtur dhe forcuar gjuhën bie mbi vetë shqiptarët, veçanërisht në një kohë kur ata janë më të arsimuar dhe më të lidhur se kurrë më parë.
Ai përmendi edhe kërkesat e studentëve shqiptarë në Maqedonia e Veriut për të drejtat në gjuhën amtare, duke i cilësuar ato si legjitime.
“Gjuha shqipe, ajo është ADN-ja jonë, është kujtesë, identitet, vazhdimësi. Përpjekjet për gjuhën janë përpjekje për të qenë vetvetja.
Nëse gjuha jonë dobësohet sot kur jemi më të ditur e më të fortë e të lidhur, përgjegjësia është vetëm e jona.
Ky është mesazhi i kërkesës legjitime të studentëve në Maqedoninë e Veriut për të fituar të drejtat e tyre në gjuhën amëtare.
Këtë duhet të keni parasysh dhe për mësuesit, vullnetarët e organizatorët në diasporë që mbajnë gjallë gjuhën tonë”, u shpreh Hoxha.
Një vlerësim të veçantë Hoxha i kushtoi mësuesve, vullnetarëve dhe organizatorëve në diasporë që kontribuojnë në ruajtjen e gjuhës shqipe, duke theksuar se ata meritojnë më shumë mbështetje konkrete nga institucionet. Ai shtoi se Ministria dhe qeveria janë të angazhuara për të forcuar këtë mbështetje.
“Ata meritojnë mirënjohje e shumë mbështetje konkrete dhe për këtë jam shumë i organizuar bashkë me ekipin e ministrisë dhe qeverinë. Forca jonë, të jemi të hapur, të mësojmë gjuhë të reja pa harruar tonën, të ndërtojmë ura me të tjerët pa shembur themelet tona.
Ne kemi marrë angazhimin që gjuhën shqipe pjesë e familjes së madhe indo-europiane, ta çojmë në vendin që meriton në familjen e madhe europiane.
Historia e diasporës, histori sakrifice, qëndrese e përkushtimi, histori suksesi”, u shpreh ministri.
Hoxha deklaroi gjithashtu se Shqipëria ka marrë angazhimin për ta çuar gjuhën shqipe, si pjesë e familjes indo-evropiane, në vendin që meriton në hapësirën evropiane.
Në fjalën e tij, ai vuri në dukje edhe rëndësinë e diasporës shqiptare, e cila sipas tij përfaqëson një histori sakrifice, qëndrese dhe suksesi. Ai bëri të ditur se në Samit marrin pjesë përfaqësues nga 38 vende të botës, duke e kthyer Tiranën në një “shtëpi të përbashkët” për shqiptarët kudo që ndodhen.
Ministri theksoi se marrëdhënia me diasporën nuk është më një rrugë me një drejtim, por një lidhje e ndërsjellë që kërkon kujdes, vëmendje dhe dëgjim të vazhdueshëm.
Dita e dytë e Samitit të Diasporës, në fokus përfaqësimi politik

Samiti i Diasporës do të vijojë sot ditën e dytë të punimeve me një axhendë të ngjeshur panelesh, ku do të diskutohen çështje kyçe që lidhen me rolin e shqiptarëve jashtë vendit në zhvillimin politik, ekonomik, kulturor dhe shoqëror të hapësirës mbarëshqiptare.
Aktivitetet zhvillohen në Pallatin e Kongreseve në Tiranë, ku dita nis me hapjen zyrtare dhe fjalët përshëndetëse të Ministrit për Evropën dhe Punët e Jashtme, Ferit Hoxha dhe Kryeministri Edi Rama, të ndjekura nga një seri panelesh tematike që trajtojnë dimensione të ndryshme të angazhimit të diasporës.
Paneli i parë i kushtohet rolit të diasporës në demokracinë përfaqësuese, duke u fokusuar tek vota nga jashtë dhe nevoja për një përfaqësim më të strukturuar institucional. Paralelisht, në panele të tjera do të diskutohet mbi diasporën si partner në biznes dhe inovacion, si dhe kontributi i saj në sistemin shëndetësor, përmes transferimit të njohurive dhe praktikave bashkëkohore.
Një tjetër panel i rëndësishëm i dedikohet rolit të librit dhe kulturës në ruajtjen e identitetit kombëtar, ndërsa diskutime të tjera do të trajtojnë bashkëpunimin mbarëshqiptar për diasporën, standardizimin e gjuhës shqipe jashtë vendit dhe rolin e diasporës në kërkimin shkencor.
Në pjesën e dytë të ditës, fokusi zhvendoset tek zhvillimi lokal dhe territorial, si dhe tek përfshirja e ekspertëve të diasporës në administratën publike. Gjithashtu, do të prezantohen modele suksesi dhe iniciativa konkrete për angazhimin e profesionistëve shqiptarë që jetojnë jashtë.
Aktivitetet do të përmbyllen me një sesion të dedikuar inovacionit dhe transformimit digjital, ku do të diskutohet mbi përdorimin e inteligjencës artificiale në shërbimet ndaj klientit dhe rolin e startup-eve.
Dita e dytë e Samitit pritet të kulmojë me mbrëmjen gala, ku do të marrin pjesë personalitete nga Shqipëria dhe diaspora, duke shënuar një tjetër moment të rëndësishëm në forcimin e lidhjeve mes shqiptarëve kudo në botë.
Samiti do të vijojë dhe në datën 15 prill në ditën e tretë një program të pasur që përfshin panele tematike. Pjesëmarrësit do të kenë mundësi të diskutojnë dhe të eksplorojnë fusha të ndryshme të interesit, përfshirë ekonominë, inovacionin, arsimin, shëndetësinë, artin dhe ruajtjen e identitetit kombëtar.
Samiti i Diasporës ngriti siparin ditën e djeshme. Në ceremoninë e mirëseardhjes, e cila u zhvillua në Teatrin Kombëtar të Operas dhe Baletit, morën pjesë Presidenti Bajram Begaj, Kryeministri Edi Rama, krerë të komuniteteve fetare, ministra, deputetë, drejtues të institucioneve të shtetit, si dhe personalitete nga të gjitha trevat shqiptare dhe diaspora, duke i dhënë ngjarjes përmasa të një feste të vërtetë kombëtare.
Në kuadër të vlerësimeve, u nderuan:
Gentian Toshkëzi, “Kalorës i Urdhrit të Skënderbeut”
Lorik Cana, “Kalorës i Urdhrit të Skënderbeut”
Klarita Gërxhani, “Kalorës i Urdhrit të Lisit Akademik”
Shqiponje Telhaj, “Kalorës i Urdhrit të Lisit Akademik”
Markus Schuhmann, “Oficer i Urdhrit të Skënderbeut”
Anders Lindberg, “Kalorës i Urdhrit të Skënderbeut”























