Seanca shtyhet ende pa nisur, vazhdon në 14:00|Video
Shkelzen Çoçaj|RTKlive
Kryetarja e Kuvendit, Albulena Haxhiu ka shtyrë për në orën 14:00 seancën për zgjedhjen e presidentit, ende pa e nisur atë të paralajmëruarë për në orën 10:00. Ajo e arsyetoi këtë duke thënë se po i pret deputetët e opozitës, që i ka ftuar të marrin pjesë në seancë. Kryeparlaamentarja ka thënë se ky është obligim kushtetues.
Kryeparlamentarja Albulena Haxhiu ka thënë se deputetët janë të detyruar të jenë të pranishëm në seancën për zgjedhjen e presidentit. Në nisje të seancës, ajo ka thënë se deputetët është dashur të lajmërojnë për arsyet për mospraninë në seancë.
Sipas saj, këtë e ka bërë vetëm deputetja Afërdita Hajrizi e Grupit Parlamentar të VV-së që ka thënë se mungon “për shkaqe shëndetësore”.
Haxhiu ka arsyetuar pretendimin e saj duke thënë se obligimi i deputetëve për të marrë pjesë në seanca të tilla paraqitet në aktgjykime të Kushtetueses.
Edhe shefja e Grupit parlamentar e Lëvizjes Vetëvendosje, Arbërie Nagavci i ka bërë thirrje opozitës që të bëhet pjesë e një procesi të rëndësishëm për zgjedhjen e presidentit, në mënyrë që të shmangen zgjedhjet.
Në deklarimin e saj para mediave Nagavci ka bërë thirrje të ndalen akuzat mes deputetëve dhe të gjendet zgjidhje për zgjedhjen e presidentit.
“Besoj që Kryetarja e Kuvendit kur të fillojë vazhdimin e seancës do të bëjë edhe një thirrje për opozitën, jemi dëshmitarë që edhe deputetët e opozitës janë shumica prej tyre këtu në Kuvend dhe i ftojmë që të vijnë në sallë dhe të bëhen pjesë e këtij procesi të rëndësishëm për të vazhduar tutje punën duke shmangur edhe një palë zgjedhje të reja. E kemi parë dje edhe kryetarin e LDK-së që prezantoi një listë me nënshkrime ndonëse pa një emër specifik, por e vërteta është që ato nënshkrime nuk i janë njoftuar as kryeministrit Kurti as mua si shefe e GP-së në mënyrë që të bashkëngjisim nënshkrimet e deputetëve tanë... Konsideroj që përtej fajësimit ose hedhjes së akuzave, e rëndësishme është të gjejmë zgjidhjen dhe ta zgjedhim presidentin”, ka thënë ajo.
Nis seanca për presidentin
Ka nisur seanca për zgjedhjen e Presidentit në ditën e fundit të afatit kushtetues. Nëse deri në mesnatë nuk arrihet zgjedhja e kreut të shtetit, Kosova mund të shkojë në zgjedhje të reja parlamentare.
Një ditë më parë, Lëvizja Vetëvendosje propozoi dy kandidate për presidente: Feride Rushitin dhe Hatixhe Hoxhën. Kandidatët e mëparshëm të seancës së 5 marsit, Konjufca dhe Mulhaxha, janë tërhequr nga gara.
Në rundin e parë të votimit, Rushiti mori 63 vota, ndërsa Hoxha nuk mori asnjë. Opozita, e cila bojkotoi seancën, e ka kritikuar pushtetin për nisjen e mbledhjes pa praninë e 80 deputetëve, duke e cilësuar këtë si shkelje të Kushtetutës.
Vazhdon seanca për presidentin, palët mbeten të ndara
Seanca për zgjedhjen e presidentit të Kosovës u ndërpre mbrëmë për shkak të mungesës së kuorumit, ndërsa pritet të vazhdojë sot në orën 10:00, mes përplasjeve të forta politike për ligjshmërinë e procesit.
Në raundin e parë të votimit morën pjesë 64 deputetë. Kandidatja Feride Rushiti mori 63 vota, ndërsa një votë rezultoi e pavlefshme. Kandidatja tjetër, Hatixhe Hoxha, nuk arriti të sigurojë asnjë votë.
Shefja e Grupit Parlamentar të Lëvizjes Vetëvendosje, Arbërie Nagavci, deklaroi se propozimi i dy kandidateve erdhi në mungesë të alternativave nga opozita.
“Në mungesë të iniciativave nga partitë tjera, kemi vazhduar me dy nominime të reja, me dy aktiviste, gra të denja dhe profesioniste, në mënyrë që të vazhdojmë procesin dhe të shmangim zgjedhje të reja”, tha Nagavci.
Ajo theksoi se seanca kishte kuorum për nisje.
“Kemi pasur kuorum për të filluar seancën e jashtëzakonshme, sepse seanca ftohet me 40 nënshkrime. Ishin të pranishëm më shumë se 61 deputetë për të filluar seancën”, tha ajo.
Sipas saj, në sallë ishin 64 deputetë dhe asnjë nga opozita nuk kishte njoftuar për mungesën.
“U pa që zonja Feride Rushiti kishte mbështetjen e deputetëve, me 63 vota nga deputetët e pranishëm”, shtoi ajo, duke i ftuar deputetët opozitarë që të marrin pjesë në vazhdimin e seancës.
Në anën tjetër, opozita e ka cilësuar procesin si antikushtetues.
Kryetari i PDK-së, Bedri Hamza, tha se zhvillimet përbëjnë “puç kushtetues”.
“Po vërehet që kjo kohë vendin po e kalon në një situatë bukur komplekse, por sonte mosserioziteti dhe papërgjegjshmëria e kanë mbërritur kulmin. Ky është një puç kushtetues”, deklaroi ai.
Hamza insistoi se Kushtetuta kërkon prezencën e 80 deputetëve për votim.
“Kushtetuta është e qartë, duhet të jenë 80 deputetë prezentë në sallë dhe të votojnë që të konsumohet raundi i parë”, tha ai, duke shtuar se procedura është zhvilluar në kundërshtim me rendin kushtetues.
Edhe kryetari i LDK-së, Lumir Abdixhiku, kritikoi zhvillimet, duke i cilësuar si të rënda për demokracinë.
“Është një natë bukur e rëndë për Republikën e Kosovës… një rast pa precedent, jodemokratik dhe antikushtetues”, tha ai.
Abdixhiku theksoi se zgjedhja e presidentit duhet të bëhet përmes marrëveshjes politike.
“E vetmja mënyrë për të zgjedhur presidentin është nëpërmjet një marrëveshjeje politike”, u shpreh ai, duke bërë të ditur se LDK ka siguruar 15 nënshkrime për kandidatin e saj.
Ndërkohë, shefi i grupit parlamentar të AAK-së, Besnik Tahiri, e cilësoi seancën si “sulm ndaj Kushtetutës”.
“Ky akt shënon një ndër shkeljet më të mëdha kushtetuese dhe një sulm të drejtpërdrejtë ndaj rendit kushtetues”, deklaroi ai, duke e quajtur situatën edhe “tentim për grusht-shtet”.























