Vazhdojnë punimet restauruese në Kullën e Hajrullah Çantës në Rahovec
Kimete Kasumi/ RTKlive
Ministrja në detyrë e Kulturës dhe Turizmit Saranda Bogujevci, ka njoftuar se po vazhdojnë me dinamikë punimet restauruese në shtëpinë-kullë të Hajrullah Çantës në Rahovec.
Sipas saj, kjo kullë, e ndërtuar në fund të shekullit XVIII, përfaqëson një shembull karakteristik të arkitekturës tradicionale të banimit në Kosovë dhe mbart vlera të veçanta historike, arkitekturore dhe artistike.
Bogujevci theksoi se restaurimi i objekteve të tilla ka rëndësi të madhe për ruajtjen e trashëgimisë kulturore, pasi ato dëshmojnë për të kaluarën dhe identitetin e vendit.
“Ndërhyrjet restauruese në këto shtëpi tradicionale, përveç ruajtjes së dëshmive të së kaluarës, janë edhe investim për promovimin turistik të vendit”, ka shkruar Bogujevci në Facebook.























