Saka i jep fitoren Arsenal ndaj Aston Villa
BKT
Sport

Saka i jep fitoren Arsenal ndaj Aston Villa

Uran Krasniqi / RTKLive

Arsenal ka nisur me dy fitore sezonin e ri në Premier League, pasi e ka mposhtur Aston Villa 1-0 në transfertë, në një ndeshje të veçantë për trajnerin Mikel Arteta.

Bukayo Saka e ka shënuar golin e vetëm të takimit në minutën e pesëdhjetë e nëntë, duke i siguruar Arsenal tri pikë në “Villa Park”.

Kjo ka qenë ndeshja e 250-të e Artetës në drejtimin e Arsenal në Premier League. Trajneri spanjoll e ka festuar këtë jubile me një tjetër fitore, ndërsa skuadra e tij vazhdon startin e mirë të sezonit.

Aston Villa e ka nisur ndeshjen më mirë dhe në minutën e dymbëdhjetë ka qenë shumë pranë golit. Emiliano Buendía ka goditur nga distanca, por topi ka përfunduar në traversë.

Arsenal gradualisht e ka marrë kontrollin e posedimit, por pjesa e parë është mbyllur pa gola dhe pa asnjë goditje në kuadrat nga të dyja skuadrat. Portieri i ri i Aston Villa, Zion Suzuki, është dalluar me një pritje të mirë ndaj goditjes me kokë të Declan Rice.

Në pjesën e dytë, Arteta ka aktivizuar Eberechi Ezen, ndërsa Villa e ka pasur rastin e parë me Ian Maatsen, i cili ka goditur jashtë.

Vendasit kanë menduar se kanë fituar një penallti kur gjyqtari Jarred Gillett ka akorduar njëmbëdhjetë metërsh pas një ndërhyrje ndaj Saka. Megjithatë, pas rishikimit nga VAR-i është konstatuar se kontakti kishte ndodhur jashtë zonës dhe vendimi ka ndryshua. Martin Odegaard ka gjuajtur pranë portës.

Arsenal e ka gjetur golin në minutën e pesëdhjetë e nëntë. Riccardo Calafiori ka depërtuar pas mbrojtjes së Villa dhe e ka dërguar topin në zonë, ku Saka është shfaqur në vendin e duhur për ta dërguar topin në rrjetë.

Ky ka qenë goli i dytë i Saka në po aq ndeshje të para të sezonit në Premier League.

Pas golit, ndeshja është bërë më e hapur. Portieri Suzuki ka shpëtuar Aston Villa nga goli i dytë, duke bërë një pritje të mirë në përballje me Kai Havertz.

Në fund, Arsenal ka arritur ta menaxhojë epërsinë dhe e ka regjistruar fitoren e dytë radhazi. “Topçinjtë” kanë fituar ndeshjen e parë si mysafirë në kampionat për të pestin sezon radhazi, duke vendosur një rekord të ri të klubit.

Për Aston Villa, situata mbetet shqetësuese. Skuadra e Unai Emeryt mbetet pa pikë pas dy ndeshjeve të para dhe, pas dy xhirove, ende nuk ka regjistruar asnjë goditje në kuadrat në Premier League.