Më shumë se 6 mijë shkolla publike në Itali kanë marrë kërcënime për bomba përmes postës elektronike, duke shkaktuar evakuimin e nxënësve dhe stafit. Pas kontrolleve të sigurisë, në asnjërën prej shkollave nuk janë gjetur mjete shpërthyese.

Sipas Latin Times, kërcënimet u dërguan më 11 nëntor në mbi 6 mijë nga rreth 7 mijë e 600 shkolla publike italiane, pak para orës 10:00, duke aktivizuar protokollet e emergjencës.

Mesazhet pretendonin se në ndërtesat shkollore ishin vendosur mjete shpërthyese të kontrolluara nga distanca, ndërsa përmbanin edhe kërcënime për sulme me thikë dhe pretendime se një bombë ishte vendosur në automjetin e kryeministres Giorgia Meloni.

Pas incidentit, Meloni thirri një mbledhje urgjente me ministrat, zyrtarët e inteligjencës dhe ekspertët e sigurisë kibernetike.

“Deri më sot, nuk ka prova që tregojnë për një rrezik konkret”, deklaroi Meloni, duke theksuar se qëllimi i kërcënimeve ishte përhapja e frikës dhe pasigurisë.

“Nuk do të lejojmë që një email anonim të vendosë për kalendarin shkollor të fëmijëve tanë. Kushdo që e bëri këtë, dëshironte një komb të paralizuar dhe të frikësuar”, shkroi ajo në platformën X.

Kryeministrja italiane bëri të ditur se çdo alarm do të hetohet, ndërsa prokurorët italianë po bashkëpunojnë me autoritetet gjyqësore evropiane për të zbuluar origjinën e kërcënimeve.

Kërcënime të ngjashme janë raportuar edhe në shkolla në Irlandë, Skoci dhe Irlandën e Veriut, ndërsa raste të krahasueshme janë regjistruar më parë në Hungari dhe Serbi.

Meloni nuk ia atribuoi përgjegjësinë ndonjë shteti apo organizate, duke theksuar se hetimet janë ende në zhvillim.

Ajo u bëri thirrje qytetarëve të vazhdojnë aktivitetet e përditshme dhe t'i dërgojnë fëmijët në shkollë si zakonisht.