Zogaj: Ka vështirësi në Kompleksin ‘Adem Jashari’ dhe ‘Ibrahim Rugova’
Drejtues të Agjencisë për Menaxhimin e Komplekseve Memoriale të Kosovës, kanë njoftuar se së shpejti do të fillojnë puna në konservimin e Kompleksit Memorial ‘Adem Jashari’, në Prekaz. Kurse, në Kompleksin Memoriali ‘Ibrahim Rugova’, janë disa probleme rreth menaxhimit, shpronësimit, prioriteteve dhe projekteve.
Kështu ka thënë drejtori i Agjencisë për Menaxhimin e Komplekseve Memoriale të Kosovës, Bislim Zogaj, para komisionit për Bujqësi, Pylltari, Zhvillim Rural, Mjedis e Planifikim Hapësinor, ku u shqyrtua raporti vjetor i kësaj agjencie për vitin 2018.
Sipas Zogajt, janë në përfundim të projektit të Mejës, por edhe në projektin në Koshare po shkojnë punët mirë.
Ai shtoi se si Agjenci kanë probleme me shpronësimin e pronave ku duan të ndërtojnë ndonjë shtatore apo kompleks.
Anëtarja e komisionit Besa Gaxheri tha se edhe ata si deputet kanë presion për kompleksin memorial “Adem Jashari’, dhe para kësaj duhet të jetë një auditor si janë investuar 9 milionë euro.
Kurse, anëtarja Ganimete Musliu tha se vet fakti që nuk dihet një datë se kur do të nis konservimi në Prekaz, mund të thuhet se nuk po bëhet asgjë.
Zogaj i tha deputetëve se nuk ka kompetencë që të hetoi të kaluarën por kushdo që dëshiro të nis hetimin e ka derën hapur në agjenci.
Komisioni nuk ka miratuar raportin e Agjencionit, me arsyetimin se raporti ka mangësi në regjistrimin e aseteve.























