Shiu vërshon sallat e fakultetit të Filologjisë dhe FSHMN-së
BKT
Lajme

Shiu vërshon sallat e fakultetit të Filologjisë dhe FSHMN-së

Reshjet e shiut që po vazhdojnë të bien që nga mëngjesi i sotëm kanë filluar të shkaktojnë probleme.

Përveç rrugëve ku komunikacioni po zhvillohet me vështirësi, shiu ka arritur të depërtojë edhe në sallat e Fakultetit të Filologjisë dhe Fakultetit të Shkencave Matematiko-Natyrore.

Profesori Milazim Krasniqi ka thënë se shiu është duke shkatërruar sallat dhe pajisjet në këto dy fakultete.

Përmes një postimi në Facebook, Krasniqi ka shkruar se asnjë reagim deri më tani nuk ka pasur nga kompania që ka hequr kulmin dhe ka lënë objektin e zbuluar.

Postimi i plotë:

“Pamje të trishtueshme në Fakultetin e Filologjisë dhe FShMN: shiu po shkatërron sallat, zyrat, pajisjet. Tërë ditën asnjë reagim nga firma që e ka hequr kulmin dhe e ka lënë objektin zbuluar. Asnjë reagim as nga rektorati (zyra që shihet është e njërit nga prorektorët!) Asnjë reagim nga MAShT. Çka do të thotë krejt kjo heshtje? Ne sot patëm gëzimin e diplomimit të studentëve, të cilin na e lëndon kjo gjendje e trishtueshme e fakultetit dhe kjo indiferencë e institucioneve. Thjesht e sheh njeriu me sy mjerimin dhe nuk arrin ta besojë deri ku ka shkuar degradimi në këtë vend”, ka shkruar Krasniqi në llogarinë e vet në “Facebook”.

 

 


MË SHUME NGA Lajme