Kurti priti ambasadoren e Finlandës në Kosovë, Pia Stjernvall
BKT
Lajme

Kurti priti ambasadoren e Finlandës në Kosovë, Pia Stjernvall

Sot, Kryetari i Lëvizjes Vetëvendosje,Albin Kurti, dhe Sekretari për Marrëdhënie me Jashtë, Kreshnik Ahmeti, mirëpritën në takim ambasadoren e Finlandës në Kosovë, Pia Stjernvall dhe këshilltaren në Ambasadën e Finlandës, Trinka Jusufi.

Sipas njoftimit të Vetëvendosjes, ambasadorja Stjernvall uroi kryetarin Kurti për rezultatin e arritur në zgjedhjet e jashtëzakonshme parlamentare dhe vlerësoi me notë pozitive procesin e rregullt zgjedhor, i cili u monitorua edhe nga vëzhguesit e Ambasadës së Finlandës në Kosovë.

"Më tutje u diskutua nevoja që Qeveria e ardhshme të realizojë reforma në sektorë të ndryshëm të vendit, me theks të veçantë në sistemin arsimor. Në takim pati pajtueshmëri që përvojat dhe ekspertiza nga sistemi arsimor i Finlandës do ta ndihmonin reformën dhe përmirësimin cilësor të sistemit arsimor të Republikës së Kosovës", thuhet në njoftim.

Në lidhje me dialogun me Serbinë, Kryetari Kurti përsëriti qëndrimin e Lëvizjes Vetëvendosje që për dialogun më e rëndësishme është përmbajtja, sesa afatet kohore, dhe tri parimet për të shëruar pasojat e qasjes së gabuar paraprake: jo marrëveshje pa dialog; jo dialog me harta; dhe, jo presidentët e shteteve mbi harta.

Në fund, Ambasadorja Stjernvall i dhuroi Kryetarit Kurti dy libra mbi inovacionet shoqërore të Finlandës, si dhuratë për rezultatin zgjedhor dhe si ndihmë për zgjidhjen inovative të problemeve më të cilat përballet vendi.

 

 


MË SHUME NGA Lajme