Kosova dhe Maqedonia Veriore të bashkuara për sigurinë kufitare
BKT
Lajme

Kosova dhe Maqedonia Veriore të bashkuara për sigurinë kufitare

Në brezin kufitar të Republikës së Kosovës dhe Maqedonisë Veriore, zona kufitare Glloboçicë, u realizua një ushtrim i përbashkët operativo-taktik i koduar “Potera-Ndjekja”.

Qëllimi i këtij aksioni ishte përndjekja dhe ndalimi i një grupi kriminal i cili pasi kryen krimin ka mundësi ikje në të dy anët e kufijve.

Kryeministri në detyrë i Kosovës, Ramush Haradinaj, i cili ishte i pranishëm në këtë ushtrim, tha se përgatitje të tilla nga të dy vendet ofrojnë siguri kufitare.

Ministri i Punëve të Brendshme i Maqedonisë Oliver Spasovski, u shpreh i kënaqur që kishin rastin të dëshmojnë gatishmërinë që kanë Republika e Kosovës dhe Maqedonia e Veriut për të reaguar në rast të ndonjë aksioni kriminal.

Ai tha se Kosova dhe Maqedoni janë të përgatitura të punojnë së bashku, për ruajtjen e sigurisë së të dyja vendeve.

Ministri i Punëve të Brendshme në detyrë Ekrem Mustafa, tha se të dy vendet sot dëshmuan se i plotësojnë kriteret e komisioneve evropiane, e që janë ruajtja e detyrës dhe kufirit shtetëror.

Drejtori i Policisë së përgjithshme të Kosovës Rashit Qalaj tha se ky aksion i përbashkët dëshmon bashkëpunimin që ka Policia e Kosovës me Policinë e Maqedonisë.

Ai u zotua se do të vazhdojë bashkëpunimi i të dyja vendeve edhe në të ardhmen sa i përket aspektit të sigurisë dhe se janë të gatshëm të reagojnë në rast të ndonjë aksioni kriminal në Kosovës ose Maqedoninë e Veriut.

Drejtori i Policisë së Maqedonisë së Veriut, Sasho Tashevski, tha se ky angazhim i të dy shteteve per mbrojtjen e kufijve dëshmon gatishmërinë për bashkëpunim.

Ndryshe, për të gjitha njësitë e përfshira në këtë ushtrim në mes Kosovës dhe Maqedonisë u ndanë mirënjohje.


MË SHUME NGA Lajme