Zemaj: Besoj që sot do të formohen institucionet e reja të vendit
BKT
Lajme

Zemaj: Besoj që sot do të formohen institucionet e reja të vendit

Deputeti i Lidhjes Demokratike të Kosovës, Armend Zemaj beson që sot do të formohen institucionet e reja të vendit.

Ai para fillimit të seancës plenare tha se është përgjegjësi e mandatarit për formimin e qeverisë që të komunikojë me pakicat, e që sipas tij do të jenë pjesë e institucioneve.

Zemaj tha se krijimin e institucioneve të Kosovës, do t’iu kthehet dinjiteti qytetarëve.

Zemaj: Sot do të konfirmohet ajo çfarë është arritur dje

“Besoj që sot do të konfirmohet ajo çka është arritur dje dhe shpresa, por edhe detyrimi ligjor dhe kushtetues është që sot t’i krijojmë institucionet të plota të Republikës së Kosovës dhe qytetarëve të saj t’iu kthejmë dinjitetin, të cilin e kanë kërkuar dhe e kanë menduar që më 6 tetor ta bëjnë këtë ndryshim. Dhe t’iu japin përgjegjësi subjekteve që ishin në opozitë që ta udhëheqin qeverinë me mandatin e ardhshëm 4- vjeçar. Pjesa që ndërlidhet me atë për të komunikuar me komunitetin pakicë që jetojnë në Republikën e Kosovës, besoj që kanë qenë përgjegjësi e mandatarit dhe sigurisht që konform kësaj ngjarje të re edhe ata do të jenë koshientë ndaj krijimit të institucioneve dhe të bëhen pjesë e saj”, tha Zemaj.

I pyetur se si do të rrjedhë seanca e sotme, dhe a do të japë dorëheqje kryetari i Kuvendit të Kosovës Glauk Konjufca, deputeti i LDK-së tha se nëse kërkohet i njëjti duhet të  deklarohet për lirimin e pozitës.

Zemaj: Nëse kërkohet Konjufca duhet të lirojë pozitën

“Marrëveshja është politike, pjesa tjetër është procedurale dhe ligjore që i takon edhe rregullores së punës së kuvendit. Kryetari i Kuvendit duhet të deklarohet për lirimin e pozitës dhe propozimi i ri dhe marrja e mandatit të ri nga kandidati apo kandidatja e re që do të jetë për Kuvendin e Kosovës. Gjithçka duhet të shkojë në konform të rregullores së punës së kuvendit dhe Kushtetutës së Kosovës... Po, sigurisht po, nëse kërkohet është në mandatin e Kuvendit që të bëjë shmangien nga rregullorja e kuvendit dhe të vazhdojë me procedurat e shpejtuara, të cilat janë edhe normë demokratike për të evituar kohën dhe për të krijuar mundësinë që të paraqitet mandatari dhe qeveria”, tha Zemaj.

Ai tha se emrat e posteve ministrore nga Lidhja Demokratike e Kosovës tha se do të paraqiten sot nga mandatari për formimin e Qeverisë së Kosovës.


MË SHUME NGA Lajme