Vuçiq: Serbia e përkushtuar për një zgjidhje kompromisi me Kosovën

Vuçiq: Serbia e përkushtuar për një zgjidhje kompromisi me Kosovën

Presidenti i Serbisë, Aleksandar Vuçiq, ka thënë se Serbia është përkushtuar për gjetjen e një kompromisi në zgjidhjen e çështjes së Kosovës.

Presidenti serb duke folur në Asamblenë Përgjithshme të KB, me rastin e shënimit të 75 vjetorit të Kombeve të Bashkuara, siç raporton ‘B92’, ka thënë se “duke mbrojtur sovranitetin dhe integritetin e saj territorial, Serbia po mbron edhe të drejtën ndërkombëtare edhe parimet themelore mbi të cilat bazohen Kombet e Bashkuara”.

“Për fat të keq, në fund të shekullit 20, ne në Serbi përjetuam masa dhe veprime të njëanshme, të cilat minuan dhe vunë në pikëpyetje efektivitetin e multilateralizmit dhe mekanizmave të bashkëpunimit ndërkombëtar, si dhe vetë të drejtën ndërkombëtare. Institucionet e përkohshme në Prishtinë e shpallën pavarësinë përmes një akti të njëanshëm dhe shkelën Rezolutën 1244 të KB, duke minuar seriozisht sigurinë e Serbisë dhe rajonit në tërësi”, tha Vuçiq.

Ai tha se Serbia është plotësisht e përkushtuar për gjetjen e një zgjidhje kompromisi për çështjen e Kosovës si dhe ndjek një politikë të përgjegjshme dhe bën përpjekje për të ruajtur interesat e qytetarëve të saj dhe paqen e stabilitetin rajonal.

Më 4 shtator, në Shtëpinë e Bardhë në Uashington, kryeministri i Kosovës, Avdullah Hoti dhe presidenti i Serbisë, Aleksandar Vuçiq, nënshkruan një marrëveshje për normalizim të marrëdhënieve ekonomike. Marrëveshja u nënshkrua në prani të presidentit amerikan, Donald Trump.

Ndërkohë dialogu mes Kosovës dhe Serbisë që ndërmjetësohet nga Bashkimi Evropian është ripërtërirë më 16 korrik. Kryeministri Hoti, dhe presidenti Vuçiq, janë takuar për herë të dytë më 7 shtator.

Me këtë rast, sipas deklaratave të të dyja palëve, janë hapur temat për Asociacionin e Komunave me shumicë Serbe, për pretendimet e përbashkëta financiare dhe pronësore, ndërkaq janë harmonizuar qëndrimet lidhur me çështjen e të pagjeturve, personave të zhvendosur, si dhe për bashkëpunimin ekonomik.