KQZ pret rekomandimet nga IKSHPK rreth votimit të personave me COVID-19
KQZ do të presë rekomandimet e IKSHPK-së se si do të organizohet votimi për personat që janë me COVID-19, në zgjedhjet për kryetar të Podujevës dhe të Mitrovicës së Veriut.
Në mbledhjen e sotme të KQZ-së Valdete Daka, tha se do të kenë rekomandime nga IKSHPK se si do të veprohet me personat që janë të infektuar me COVID-19.
"Sekretariati do të kontaktojë me IKSHPK që të kemi edhe nga ata ndonjë rekomandim se si të veprohet", tha ajo.
Anëtari i KQZ-së Sami Kurteshi, tha se duhet t'i mundësohet çdo personi që të ketë mundësi për të votuar.
“Në komunat ku do të ketë zgjedhje numri i të prekurve nuk është i madh dhe KQZ e ka mundësinë që t'i identifikojë. Atyre duhet t’iu mundësohet shprehja e vullnetit përmes votës. Të identifikohen njerëzit që izolohen dhe t'iu mundësohet votimi", tha Kurteshi.
Në mbledhjen e sotme me 9 vota për dhe 1 kundër, KQZ ka regjistruar si parti politike "Yenilikçi Türk Hareket Partisi”. Kjo ndodhi pas vendimit të PZAP që kishte anuluar vendimin e KQZ-së që kishte refuzuar ta regjistronte këtë parti.
Kundër ka votuar anëtari i KQZ-së Rifat Krasnic nga partia KDTP, i cili ka kërkuar që kjo parti të mos regjistrohet.
"Ato nënshkrime 99 përqind asnjë nuk përfaqëson komunitetin turk. Doni komunitetin turk që jeton në Kosovë me e bë copa-copa", tha ai.
Por, që kjo parti të regjistrohet ka kërkuar anëtari i KQZ-së nga LVV Sami Kurteshi.
"PZAP me vendimin e vet e ka vërtetuar një absurd të KQZ-së. Vendimi i PZAP ishte një shuplakë shumë e madhe për KQZ", tha ai.























