Policia po heton grafitet në shtëpinë e Adelina Graincës
Gjatë mbrëmjes së djeshme në pjesët e murit rrethues të shtëpisë ku banon deputetja e Lëvizjes Vetëvendosje, Adelina Grainca, disa persona të panjohur kanë shkruar grafite fyese.
Policia ka bërë të ditur se rasti është raportuar mbrëmë dhe se hetimet kanë filluar,
“Ferizaj 20.04.2021-21:55. Është raportuar se person-a të panjohur në disa lokacione kanë shkruar disa grafitë. Rasti vazhdon të hetohet.”
Adelina Grainca, u zgjodh deputete e Kuvendit të Kosovës nga lista e Partisë Demokratike të Kosovës.
Por, rreth dy javë ditë pas konstituimit të Kuvendit të Kosovës, në ditën e zgjedhjes së Vjosa Osmanit presidente, ajo zgjodhi të ndërronte subjektin politik. Kaloi nga radhët e PDK-së në Lëvizjen Vetëvendosje të kryeministrit Albin Kurti.
Pas këtyre grafiteve kanë reaguar nga Lëvizja Vetëvendosje.
Ushtruesja e detyrës së Shefes së Grupit Parlamentar të Vetëvendosjes, Mimoza Kusari-Lila, ka kërkuar nga PDK’ja që ta dënojnë, siç ka thënë, këtë akt të shëmtuar, duke thënë se nëse nuk ndodh një gjë e tillë, atëherë kjo është përgjigja për arsyen e largimit të Graincës nga PDK’ja.
Megjithatë, Partia Demokratike e Kosovës ka mohuar akuzat në lidhje me grafitet fyese për ish deputeten nga kjo parti.
Ndërkohë, Avni Bytyçi, zëdhënës i Partisë Demokratike të Kosovës (PDK), ka thënë se partia të cilës i përket ai nuk beson në këtë formë të “protestës” dhe se vetë ajo ka qenë, siç ka thënë ai, viktimë e këtij lloj sulmi në të kaluarën.
“Vetë reagimi i LVV-së tregon qartazi se kush qëndron mbrapa këtyre grafiteve. Pyetjet me rëndësi që duhen shtruar është se pse tani pasi disa javë janë bërë këto grafite? Edhe atë në shtëpinë e gabuar?! Partia Demokratike e Kosovës asnjëherë nuk e ka ulur vetën në këtë nivel duke e sulmuar dikë në shtëpi e në familje për motive politike. Për këtë arsye ky sulm është i papranueshëm për ne”, ka thënë ai po ashtu përmes Facebookut.























