Paqe në “St. James’s Park”, s’ka fitore për Newcastle dhe Leeds
BKT
Sport

Paqe në “St. James’s Park”, s’ka fitore për Newcastle dhe Leeds

Newcastle dhe Leeds United do të duhet të presin ende për të shijuar fitoren e parë në sezonin e ri të Premier Leagues, pasi nuk shkuan dot përtej barazimit 1-1 në “St. Jame’s Park”, në sfidën hapëse të javës së pestë.

Leeds e nisi më mirë ndeshjen dhe gjeti avantazhin me anë të brazilianit Raphinha në minutën e 13’, megjithatë vendasit reaguan mirë dhe një minutë para fundit të pjesës së parë gjetën golin e barazimit me sulmuesin Saint-Maximin.

Pjesa e dytë ishte gjithashtu mjaft e luftuar, por mungoi konkretizimi dhe mbeti në fuqi rezultati 1-1, që u jep nga një pikë të dy skuadrave, të cilat nuk e kanë gjetur ende fitoren e parë sezonale. Ky ishte barazimi i tretë i Leeds United në pesë javët e para, ndërsa Newcastle ka regjistruar vetëm dy barazime e tre humbje.

Në kampionatin francez, java e 6 startoi me përballjen Strasbourg-Metz, aty ku vendasit zgjidhën gjithçka brenda 45 minutave, duke shënuar tre herë dhe marrë fitoren e pastër 3-0, që i ngjit përkohësisht në kuotën e 7 pikëve.

Ajorque hapi serinë e golave në minutën e 6’, ndërsa më pas ishte sulmuesi senegalez Habibou Diallo që shënoi dy herë të tjera brenda pjesës së parë, duke vulosur suksesin e vendasve.