ORCA kundërshton emërimin e anëtarëve në KD në Universitete Publike
Organizata për Rritjen e Cilësisë në Arsim ka organizuar aksionin simbolik “Kali i Trojës në universitete publike”, pasi sipas tyre pesë profesorë të kolegjeve private janë emëruar në Këshillin Drejtues në Universitetet Publike.
Leotrim Pajaziti student në Universitetin Publik, “Hasan Prishtina”, ka treguar se kush profesorë dhe për cilat universitete bëhet fjalë.
“Pesë profesorë janë emëruar nga ministria, 1. Majlinda Belegu, kolegji AAB, 2. Sevim Mustafa nga kolegji AAB, Agron Hajdari, Florian Qehaja dhe Hazir Gashi. Këshilli drejtues është organi më i rëndësishëm dhe vendosja në krye të Universitetit të njerëzve që rrogën primare e marrin në institucione private është skandaloze. Kjo është futje e “kalit të trojës” në UP në vend. Ky veprim përbën konflikt të hapur. Kolegjet private e rrezikojnë cilësinë e arsimit në vend për afera korruptive milionëshe. Komiteti i kongresit do te vazhdojë me aksione për veprime të tilla denigruese. Ne do të monitorojmë punën e këshillit drejtues dhe bëjmë thirrje ministrisë të marrë masa”, ka thënë Pajaziti.























