LVV: SPD e priti me shqetësim armatosjen e rëndë të Serbisë
N.M. /RTKlive
Një delegacion i përbërë nga nënkryetarja e Lëvizjes, Fatmire Kollçaku, kryetari i Komisionit Parlamentar për Politikë të Jashtme, Haki Abazi, dhe anëtari i Kryesisë së Lëvizjes, Arbër Zaimi, me ftesën dhe organizimin e Friedrich-Ebert-Stiftung (FES), u takuan në Berlin me anëtarë të rëndësishëm të partisë socialdemokratike (SPD) si dhe me zyrtarë të rëndësishëm për marrëdhëniet e Kosovës dhe rajonit me Gjermaninë.
“Temat që u diskutuan ishin të gjera, prej aspektit vleror mbi të cilat themelohet e forcohet Bashkimi Evropian, e deri tek strategjitë e zgjerimit përballë rreziqeve gjeopolitike në pjesën lindore të kontinentit. Në takime morën pjesë edhe deputetë e aktivistë me prirje demokratike nga opozita serbe. Nga ana e socialdemokratëve gjermanë u prit me shqetësim armatimi i rëndë i Serbisë, dhe u diskutua për nevojën e mbrojtjes e integrimit të shpejtë të Kosovës në Këshill të Evropës, NATO, si dhe hapat drejt BE”, njofton Lëvizja Vetëvendosje (LVV).
Tutje, në njoftim thuhet se u prit mirë qasja proaktive dhe kreative që ka ndjekur Kosova në dialogun për njohje të ndërsjellë, pavarësisht bllokimit të vazhdueshëm të çdo zgjidhjeje nga pala serbe si për temat e mëdha ashtu edhe për ato të vogla.
“Temë kryesore e diskutimeve ishte edhe nevoja urgjente për të liberalizuar vizat për qytetarët e Kosovës, teksa deputetët socialdemokratë gjermanë ishin të vetëdijshëm dhe të angazhuar për zgjidhjen sa më të shpejtë të këtij problemi.
Përfaqësuesit e Lëvizjes, gjithashtu njoftojnë se gjatë qëndrimi në Gjermani nga 27 deri në 29, ata patën takime të shumta atje.
























