Premtohet përparësi punësimi për persona me aftësi të kufizuara
Të papunë janë shumë persona me aftësi të kufizuara. Edhe pse përmes ligjit inkurajohen për t`u punësuar, ka raste kur ata edhe pse janë të punësuar u cenohet vendi i punës për shkak të kritereve që kërkohen. Një punëtor me aftësi të kufizuara në Gjilan që kujdeset tash e sa vite për parkun e qytetit, ka brengën se do të mbesë pa punë. Kjo pasi Komuna ka shpallur konkurs për këtë pozitë dhe një ndër kriteret e paraqitura në konkurs rrezikojnë ta skualifikojnë nga gara.
Që nga viti 2009, Avdil Ibishi bashkë me kolegët e tij kujdeset për parkun e qytetit në Gjilan. Nga 30 qershori, pas 13 vjetëve, atij i ka skaduar kontrata, ndërsa brengoset që mund të mbes i papunë për shkak të kritereve që kërkohen në konkursin e shpallur këto ditë nga Komuna e Gjilanit.
Një nga kriteret e konkursit është që kandidati të ketë së paku shkollën e mesme, por Ibishi që është me aftësi të kufizuara, nuk e përmbushë këtë kriter, pasi thotë se për shkak të shëndetit nuk kishte pasur mundësi ta vazhdoj shkollimin përveç atij fillor të ulët.
Drejtori i shërbimeve publike në komunën e Gjilanit, Mentor Mihovci thotë se kjo kategori është e paraparë edhe me ligj që të mos diskriminohet nga e drejta për punësim.
Në komunën e Gjilanit janë të punësuar disa persona me nevoja te veçanta, ndërsa sipas përfaqësuesve të komunës, numri i këtyre personave që do të punësohen, pritet të rritet.























