Shtohen thirrjet për liberalizim të vizave për Kosovën
Jeton Musliu/RTKlive
Çdo ditë e më shpesh, shtohen zërat nga ligjvënës gjermanë por edhe evropianë se liberalizimi i vizave për Kosovën duhet të ndodhë dhe se një vendim i tillë është shumë i vonuar.
I fundit në këtë listë por jo i vetmi është deputeti gjerman, Thomas Hacker.
Në një postim të Twitter ai ka shkruar lidhur me lajmin se Presidenca Çeke e Bashkimit Evropian, së shpejti do të rihapë diskutimin për liberalizimin e vizave.
“…Komisioni nuk duhet të çojë në diskutime të pafundme. Kosova ka merituar liberalizimin e vizave shumë kohë më parë”, tha ai.
Sipas Hacker, me të drejtë Presidenca Çeke e BE-së po i përkushtohet kësaj teme.
Lidhur me këtë çështje gjatë kësaj jave në Kosovë do të vijë për vizitë ministri i Punëve të Jashtme të Çekisë, Jan Lipavsky.
Kosova është vendi i fundit në Ballkanin Perëndimor që nuk gëzon liberalizimin e vizave edhe pse i ka plotësuar kushtet para disa vitesh.
























