Godina e ish-ambasadës italiane në vitet ’30 i nënshtrohet restaurimit
ATSH
Ministrja e Kulturës, Elva Margariti njoftoi nëpërmjet një postimi në rrjetet sociale se godina e ish-të përndjekurve politikë është një tjetër objekt që po i nënshtrohet restaurimit falë programit EU4Culture, zbatuar nga UNOPS. Ministrja Margariti ishte e pranishme në mjediset e ndërtesës e cila është bërë gati për ndërhyrjet restauruese.
E njohur si godina e ish-të Përndjekurve Politikë, ajo ka shërbyer si selia e Ambasadës Italiane në vitet ’30 të shekullit XX. Eleganca e interierëve të asaj kohe ruhet ende pjesërisht dhe qëllimi i restaurimit është të nxjerrë në pah elementet autentike të godinës, duke ruajtur funksionin e tanishëm.
Pjesë e restaurimit janë riparimet e dëmeve të tërmetit dhe përmirësimi i të gjithë sistemeve të funksionimit.
Godina u shërben dy institucioneve të rëndësishme: Institututit të Ish-të Përndjekurve Politikë dhe Institutit të Studimeve për Krimet dhe Pasojat e Komunizmit.























