“Bizanti shqiptar” në festivalin e filmit arkeologjik
BKT
Kulturë

“Bizanti shqiptar” në festivalin e filmit arkeologjik

atsh

Në sallën UNESCO të Muzeut Historik Kombëtar sot është dita e pestë e festivalit “Arkeovizion”, gjithashtu dita e një filmi shqiptar. Tema e këtij viti është “Kthim në të ardhmen” dhe fokusohet në trashëgiminë arkeologjike. Shqipëria përfaqësohet me dy dokumentarë në këtë festival: “Një udhëtim në kohë në gjurmët e karvanëve të jugut të Shqipërisë” dhe “Duke kundruar Bizantin nga Shqipëria”.

Sot është dita e filmit mbi Bizantin, ku spektatorët do të njihen me ndikimin e Perandorisë Bizantine në historinë, artin dhe kulturën në Shqipëri. Rolin që ka luajtur hapësira Shqiptare në periudhën e Bizantit dhe si kanë qenë marrëdhëniet e shqiptarëve me Perandorinë Bizantine, rrymat kulturore, që nga Kostandinopoja janë pasqyruar në hapësirën shqiptare dhe si janë përvetësuar, modifikuar dhe zbatuar ato duke u bërë pjesë e kulturës sonë.

“Duke kundruar Bizantin nga Shqipëria” është një prodhim i financuar nga Bashkimi Europian (54 minuta), me skenar të Andi Rëmbecit, regji të Denald Grepckës, prodhuar nga “Argjiro”.

“Arkeovizion” filloi si nismë e Institutit Italian të Kulturës dhe Ambasadës Franceze, në partneritet me Institutin e Arkeologjisë. Ky festival ka për qëllim qasjen ndaj ngjarjeve kulturore që lidhen me vendet dhe historinë e tyre; të shpjegojë punën e ekspeditave arkeologjike; të përmirësojë qasjen virtuale në këtë trashëgimi si për shqiptarët, ashtu edhe për të huajt, si dhe të trajtojë aspekte edukative dhe ekonomike, si novacioni digjital, turizmi etj. 


MË SHUME NGA Kulturë