Mehaj e Viehe diskutojnë për sigurinë në rajon
B. Halimi / RTKlive
Ministri i Mbrojtjes, Armend Mehaj, priti sot në takim shefen e Operacioneve Aktuale të Divizionit Operativ të Shtabit të Përgjithshëm të NATO-s, Ariella Viehe, të cilën e njoftoi me zhvillimet aktuale në Ministrinë e Mbrojtjes dhe FSK, si dhe planet për të ardhmen.
Ai e njoftoi me bashkëpunimin e ngushtë me Ekipin Këshillues dhe Ndërlidhës të NATO-s (NALT), duke i shprehur mirënjohjen e lartë për mbështetjen e deritashme për të gjitha proceset zhvillimore në Ministri të Mbrojtjes dhe FSK, njofton Ministria e Mbrojtjes.
“Ndër të tjera, ministri Mehaj me znj. Viehe, diskutuan për mjedisin aktual të sigurisë në rajon, si dhe sfidat dhe kërcënimet që e cenojnë atë, duke vazhduar diskutimin edhe për zhvillimet gjeopolitike me theks të veçantë për krizën e Ukrainës. Përveç bashkëpunimit të shkëlqyeshëm, e potencoi edhe rolin shumë të rëndësishëm të NATO-s me operacionin KFOR në funksion të paqes, sigurisë dhe stabilitetit rajonal dhe më gjerë”, thuhet në njoftim.
Mehaj në këtë takim e njoftoi mysafiren edhe me miratimin e plotësim/ndryshimit të tri ligjeve themelore, si dhe për angazhimet shtetërore integruese të Kosovës në Programin e Partneritetit për Paqe, si rrugë drejtë procesit për anëtarësim në NATO.
Ky takim ndodhi në prag të nisjes së ministrit Mehaj në udhëtim zyrtar për në Kanada.























