Dy gjeneralët, Osborn dhe Jashari diskutojnë për investimet në FSK
M.Sh/RTKlive
Komandanti i Gardës Kombëtare të Iowa’s, gjeneralbrigade Stephan Osborn së bashku me komandantin e Forcës së Sigurisë së Kosovës (FSK), Bashkim Jasharin, vizituan zonën e trajnimit të FSK-së në Babaj të Bokës, për të parë nga afër trajnimet e ushtarëve kosovarë në terren.
Kjo vizitë, sipas njoftimit për media lëshuar nga FSJ, është bërë në kuadër të vizitës së komandantit Osborn në zonën e trajnimit në Babaj të Bokës, ku Regjimenti i parë i Forcave Tokësore është duke realizuar ushtrimin fushor “Iron Wolf”.
“Gjeneralët përcollën nga afër skenarët e manovrës luftarake të ekzekutuara nga Regjimenti i parë, dhe ndër të tjera diskutuan për planet e investimit të FSK-së në zonën e trajnimit dhe poligonet e planifikuara në këtë zonë”, thuhet në njoftim.
Me këtë rast komandanti i FSK-së gjeneral Jashari, ka falënderuar Gardën e Iowa’s për bashkëpunimin me FSK-në, dhe ushtrinë amerikane për mbështetjen me fonde për të investuar në këtë zonë me interes të veçantë për ushtrinë kosovare.
“Kjo zonë do të mund të shfrytëzohet edhe nga vendet partnere dhe të rajonit për të krijuar mundësi të shkëmbimit të përvojave dhe ndërveprueshmërisë”, thuhet në njoftimin e Zyrës për Informim të FSK-së.

























