Kurti përfundon ciklin e takimeve me partitë e komuniteteve joshumicë
BKT
Lajme

Kurti përfundon ciklin e takimeve me partitë e komuniteteve joshumicë

V.S|RTKlive

Me Partinë e Ashkalinjëve për Integrim është përmbyllur cikli i takimeve konsultative të kryeministrit Albin Kurti, i cili njëherësh është lider i Vetëvendosjes, parti fituese e zgjedhjeve të 9 shkurtit, me partitë e komuniteteve joshumicë rreth krijimit të institucioneve të reja.

Në zyrën kryeministrore ishte Etem Arifi, që e kryeson këtë parti, dhe deputeti i zgjedhur ashkali, Artan Asllani.

“Diskutuan rreth hapave përpara drejt formimit të institucioneve në legjislaturën e 9-të dhe për bashkëpunimin në këtë drejtim. U pajtuan mbi rëndësinë e konstituimit të Kuvendit dhe formimit të qeverisë pa vonesa, si përgjigje ndaj vullnetit të qytetarëve për zhvillim dhe progres, të shprehur në zgjedhjet parlamentare të 9 shkurtit,” thuhet në njoftimin që shpërndau qeveria rreth përmbylljes së ciklit të takimeve me partitë e komuniteteve jo shumicë që kanë zënë ulëse parlamentare.

Më herët, e kishte takuar edhe deputetin e zgjedhur të komunitetit goran, që është kryetar i Partisë Unike Gorane, Adem Hoxha.


Në takim, siç tha kryeministria, u theksua rëndësia e seancës konstituive të Kuvendit të datës 15 prill në procesin e formimit të institucioneve të legjislaturës së 9-të dhe roli e angazhimi i partive politike në parlament për të përfaqësuar dhe përmbushur vullnetin e qytetarëve të shprehur me 9 shkurt.

Gjatë ditës, kryeministri Kurti, së bashku me zëvendëskryeministrin Bislimi, kanë takuar deputetë të zgjedhur dhe përfaqësues politikë edhe të komuniteteve tjera joshumicë, derisa kjo ishte dita e dytë e këtyre takimeve që u zhvilluan me t’u caktuar nga presidentja data e seancës konstituive që është 15 prilli.

Ndërkohë, të martën, kryeparlamentari Glauk Konjufca do t’i presë në takim liderët politikë të të gjitha partive që kanë fituar mandate në zgjedhjet parlamentare.


MË SHUME NGA Lajme