LDK thotë se ka ofruar zgjidhje, VV insiston për votim të fshehtë
M.P. / RTKlive
Disa nga deputetët e partive politike janë deklaruar pak para nisjes së seancës së 16-të konstituive të Kuvendit të Kosovës.
Armend Zemaj nga LDK ka ndërlidhur rëndësinë e formimit të institucioneve të reja edhe me faktin e rritjes së çmimeve në treg, si alarm që duhet t’iu kundërvihet në mënyrë institucionale.
“LDK nuk është në situatën ku ta quaj një zgjidhje kompromisi. Ne kemi ofruar zgjidhje e cila është në interes të qytetarëve por edhe për krijimin e institucioneve të reja”, ka thënë ai.
Armend Muja nga Lëvizja Vetëvendosje ka konfirmuar që kandidatja e propozuar do të vazhdojë të jetë Albulena Haxhiu, ndërkaq insistoi që votimi do të bëhet për anëtarët e Komisionit për zgjedhjen e kryetarit të Kuvendit, me votim të fshehtë.
“Ne kemi propozuar kandidatin dhe është kandidati ynë. Unë besoj që kompromiset mund të bëhen te propozimi i Qeverisë, jo te Kuvendi”, ka thënë ai.























