Fest 64 nis përgatitjet intensive, artistët rrëfejnë emocionet e para
BKT
Kulturë

Fest 64 nis përgatitjet intensive, artistët rrëfejnë emocionet e para

rtsh

Në Sallën e Orkestrës së Radio Televizionit Shqiptar kanë nisur përgatitjet intensive për ngjarjen më të rëndësishme të fundvitit, Festivali i Këngës.

Tashmë në prova janë bashkuar artistët, bendi muzikor si edhe Orkestra e Radio Televizionit, ku po ndërlidhin të gjithë elementet dhe detajet për të qenë gjithçka e përsosur për netët live të Fest 64.

Ky vit do të ngjisë në skenë artistë të rinj, të cilët Festivalin e Këngës e shohin si një trambolinë për karrierën e tyre artistike, ashtu edhe artistë të afirmuar të skenës shqiptare, të cilët kanë lënë gjurmë me hitet e tyre.

“Kjo eksperiencë është shumë emocionuese për mua, pasi po marr pjesë për herë të parë në Festivalin e Këngës. Kam punuar me Florent Boshnjaku dhe Erona Rushiti, kemi bërë prova live me Orkestrën dhe kemi shkuar shumë mirë”, u shpreh këngëtarja Rigersa Lola.

“Është kënaqësi që rikthehem pas kaq shumë vitesh. Emocionet e forta janë gjithmonë. Kënga është baladë e fortë. Bashkëpunim me Xhevdet Gashin dhe Afërdita Saraçini-Kelmedi. Është hera e parë që bashkëpunoj me autorë nga Kosova, kështu që jam i lumtur edhe për këtë fakt”, u shpreh këngëtari Vedat Ademi.

“Këtë vit jam pak më klasik, pop-rock, një këngë që e kam kompozuar vetë. Mezi po pres ta performoj”, tha këngëtari Lorenc Hasrama.

“Kënga është e bërë dhe kompozuar nga Beatrice Gjergji dhe Marcelo Boteli. Është një këngë që flet për realitetin tonë. Ka ankth, gjëra që çdo person apo i ri i kalon një herë në jetë”, tha këngëtarja Ghiti.

Pas provave të para në sallën e Orkestrës, provat do të zhvendosen në Pallatin e Kongreseve, ku do të finalizohen detajet e fundit teknike, ndërsa ditë pas dite stafi organizativ, në bashkëpunim me Drejtoreshën Artistike të Fest 64, Elhaida Dani, do të zbulojë për publikun surprizat që rezervon ky edicion.


MË SHUME NGA Kulturë