"Shtëpia e verdhë” nga një akuzë në një rrëfim botëror, Hoxha e sjell historinë
BKT
Kulturë

"Shtëpia e verdhë” nga një akuzë në një rrëfim botëror, Hoxha e sjell historinë

RTKlive

Romani “La Maison Jaune” i shkrimtarit Bashkim Hoxha, i përkthyer në frëngjisht nga Sébastien Gricourt, është prezantuar në Paris, në një mbrëmje letrare që vuri në qendër të debatit të vërtetën, kujtesën dhe mënyrën se si ndërtohen rrëfimet.

Në Qendrën Kulturore Shqiptare “28-11”, në kuadër të Javës Shqiptare në Paris, autori Bashkim Hoxha dhe përkthyesi Sébastien Gricourt bashkëbiseduan me publikun për romanin dhe temat që ai trajton. “La Maison Jaune” e vendos lexuesin përballë një historie ku kufijtë mes realitetit, fiksionit dhe propagandës bëhen gjithnjë e më të paqartë.

Në qendër të romanit janë një drejtor fotografie italian dhe një regjisor rumun, të angazhuar nga një produksion hollivudian për të realizuar një film mbi akuzat e njohura si “shtëpia e verdhë”. Në kërkim të historisë që duhet ta sjellin në ekran, ata udhëtojnë nga Serbia në Kosovë dhe më pas në veri të Shqipërisë. Por, teksa përballen me njerëzit dhe vendet që lidhen me rrëfimin, bindjet e tyre fillojnë të lëkunden.

Ajo që në fillim duket si një histori e gatshme për t’u treguar, gradualisht shndërrohet në një pyetje mbi mënyrën se si krijohet një narrativë dhe se çfarë ndodh me të vërtetën kur ajo përzihet me fiksionin.

Përmes romanit, Hoxha trajton edhe mënyrën se si një akuzë e kontestuar dhe e hedhur poshtë për mungesë provash mund të marrë përmasa ndërkombëtare dhe të shndërrohet në një rrëfim të njohur globalisht. Vepra nuk ndalet vetëm te lufta dhe pasojat e saj.

Në fund, rrëfimi zhvendoset drejt komuniteteve arbëreshe në Itali, duke e çuar historinë përtej hapësirës së konfliktit dhe drejt kujtesës, identitetit dhe vazhdimësisë.

Përkthimi në frëngjisht nga Sébastien Gricourt e sjell romanin para një audience të re frankofone dhe e vendos veprën e Hoxhës në një hapësirë më të gjerë të dialogut kulturor.

Mbrëmja letrare në Paris u shoqërua me diskutime me publikun mbi librin, procesin e përkthimit dhe mënyrën se si letërsia mund të vërë në pikëpyetje rrëfimet që ndërtohen rreth ngjarjeve historike. Aktiviteti u mbajt më 2 tetor në Qendrën Kulturore Shqiptare “28-11”, në Paris, në kuadër të Javës Shqiptare në Paris.


MË SHUME NGA Kulturë